भारताचे माजी वेगवान गोलंदाज आर. विनय कुमार यांच्यावर एक मोठी जबाबदारी सोपवण्यात आली आहे. कर्नाटक क्रिकेट संघाने त्यांना आगामी देशांतर्गत हंगामासाठी मुख्य प्रशिक्षक म्हणून नियुक्त केले आहे. 42 वर्षीय विनय कुमार यांना देशांतर्गत क्रिकेटचा दांडगा अनुभव आहे आणि ‘रेड-बॉल’ क्रिकेटमधील कर्नाटकच्या सर्वोत्तम वेगवान गोलंदाजांपैकी एक म्हणून त्यांची ओळख आहे.
अनिल कुंबळे, राहुल द्रविड, सुनील जोशी आणि व्यंकटेश प्रसाद यांसारख्या दिग्गज खेळाडूंचा समावेश असलेल्या कर्नाटक राज्य क्रिकेट असोसिएशनच्या (KSCA) क्रिकेट प्रशासकीय समितीने (CAC) विनय कुमार यांच्या नियुक्तीला मंजुरी दिली आहे. विनय कुमार यांच्या नियुक्तीसोबतच पुरुष आणि महिला संघांच्या सहाय्यक प्रशिक्षकांची घोषणा 13 ऑगस्ट रोजी होणाऱ्या कार्यकारी समितीच्या बैठकीत होण्याची शक्यता आहे. तसेच, ते कर्नाटक राज्य क्रिकेट असोसिएशनच्या (KSCA) इतिहासातील सर्वाधिक मानधन घेणारे प्रशिक्षक ठरू शकतात, अशीही चर्चा आहे.
विनय कुमार यांनी भारतासाठी एक कसोटी सामना खेळला असून त्यात एक बळी घेतला आहे. याव्यतिरिक्त, त्यांनी 31 एकदिवसीय आंतरराष्ट्रीय सामन्यांमध्ये (ODI) 38 बळी आणि 9 टी-20 आंतरराष्ट्रीय सामन्यांमध्ये 10 बळी घेतले; अशा प्रकारे त्यांची एकूण आंतरराष्ट्रीय बळींची संख्या 48 इतकी आहे.
विनय कुमार यांनी आयपीएलमध्येही महत्त्वाची भूमिका बजावली. त्यांनी 2008 मधील पहिल्या हंगामात रॉयल चॅलेंजर्स बंगळुरू संघाकडून आपल्या आयपीएल कारकिर्दीची सुरुवात केली. त्यानंतर त्यांनी कोची टस्कर्स केरळ, कोलकाता नाईट रायडर्स आणि मुंबई इंडियन्स या संघांचे प्रतिनिधित्व केले.
क्रिकेटमधून निवृत्त झाल्यानंतर, त्यांनी मुंबई इंडियन्ससाठी ‘टॅलेंट स्काउट’ (प्रतिभावान खेळाडू शोधणारे) म्हणून काम केले आणि युवा खेळाडूंना शोधण्याची जबाबदारी पार पाडली. तसेच, त्यांनी ILT20 स्पर्धेत ‘एमआय एमिरेट्स’ (MI Emirates) संघाचे गोलंदाजी प्रशिक्षक म्हणूनही काम पाहिले. त्यानंतर त्यांनी क्रिकेट समालोचनाच्या क्षेत्रातही आपला हात आजमावला.
आर. विनय कुमार यांनी जे. अरुण कुमार यांच्या नेतृत्वाखाली बंगालविरुद्ध रणजी ट्राॅफी स्पर्धेत पदार्पण केले. त्या सामन्यात बंगालचा कर्णधार रोहन गावस्कर हा त्यांचा पहिला बळी ठरला. २०१९ मध्ये आपल्या कारकिर्दीच्या उत्तरार्धात, त्यांनी कर्नाटक सोडून पुद्दुचेरी संघाची वाट धरली. त्यानंतर, आयपीएलचा करार न मिळाल्यामुळे, २०२१ मध्ये त्यांनी क्रिकेटच्या सर्व प्रकारांतून निवृत्ती जाहीर केली.
