पृथ्वी शॉ पाठोपाठ आता केकेआरच्या राहुल त्रिपाठीवरही पुण्यात पोलिसांचा कारवाईचा बडगा

भारतात सध्या कोरोना व्हायरसची परिस्थिती बिकट आहे. रोज लाखोंमध्ये रुग्णसंख्या वाढत आहे. त्यामुळे अनेक राज्यात लॉकडाऊन करण्यात आले आहे. पुण हे शहरही सर्वाधिक कोरोनासंख्या असलेल्या शहरांपैकी एक आहे. त्यामुळे नियम कठोर करण्यात आले असून नियम मोडणाऱ्यांवर कडक कारवाई करण्यात येत आहे, मग ते कितीही मोठे सेलिब्रेटी असले तरी त्यांना कारवाईला सामोरे जावे लागत आहे. अशाच कारवाईला नुकतेच क्रिकेटपटू राहुल त्रिपाठीला सामोरे जावे लागले आहे.

देशांतर्गत क्रिकेट महाराष्ट्राकडून खेळणारा पुण्याचा राहुल त्रिपाठीवर विनामास्क फिरल्याबद्दल दंडात्मक कारवाई करण्यात आली आहे. राहुल शुक्रवारी (२८ मे) विनामास्क कारमधून प्रवास करत होता. त्यामुेळे पुण्यातील कोंढवा विभागातील पोलिसांनी त्याला खडीमशीन चौकात अडवले. त्याला अडवल्यानंतर त्यांना तो प्रसिद्ध क्रिकेटपटू असल्याचे समजले. पण असे असले तरी पोलिसांनी आपले कर्तव्य योग्यरितीने बजावत राहुलला ५०० रुपयांचा दंड भरण्यास सांगितला. पोलिसांनी दाखवलेल्या प्रामाणिकपणाचे सध्या कौतुक होत आहे.

कोलकाता नाईट रायडर्स संघाचा भाग आहे राहुल
राहुल त्रिपाठी हा आयपीएलमध्ये सध्या कोलकाता नाईट रायडर्सकडून खेळतो. तो यापूर्वी २०१७ साली रायझिंग पुणे सुपरजायंट्सकडून खेळताना प्रसिद्धीझोतात आला होता. त्यानंतर २०१८ आणि २०१९ हंगामात तो राजस्थान रॉयल्सकडून खेळला. तर २०२० पासून तो कोलकाता संघाचा भाग आहे. त्याने आत्तापर्यंत आयपीएलमध्ये ५२ सामने खेळले आहेत. यामध्ये त्याने २५.५४ च्या सरासरीने ६ अर्धशतकांसह ११७५ धावा केल्या आहेत.

राहुलने त्याच्या कारकिर्दीत ४४ प्रथम श्रेणी क्रिकेट सामने खेळले आहेत. यात त्याने ६ शतके आणि १२ अर्धशतकांसह २३५९ धावा केल्या आहेत. तसेच त्याने ३८ अ दर्जाचे आणि ९३ टी२० सामने खेळले आहेत. त्याने अ दर्जाच्या क्रिकेटमध्ये १०१० धावा केल्या असून टी२० क्रिकेटमध्ये १९३९ धावा केल्या आहेत. याशिवाय त्याने प्रथम श्रेणी क्रिकेटमध्ये ११, अ दर्जाच्या क्रिकेटमध्ये ३ आणि टी२० क्रिकेटमध्ये १२ विकेट्स घेतल्या आहेत.

पृथ्वी शॉवर देखील कारवाई
काही दिवसांपूर्वीच युवा क्रिकेटपटू पृथ्वी शॉ विना ई-पास गोव्याला निघाला होता. त्यामुळे त्याला आंबोलीमध्ये सिंधुदूर्ग पोलिसांनी अडवले. त्यांनी त्याला तासभर थांबवून ठेवले होते. अखेर शॉने ई-पाससाठी ऑनलाईन अर्ज केला आणि ई-पास आल्यानंतर तो पोलिसांना दाखवत त्याने पुढे मार्गक्रमण केले होते.

महत्त्वाच्या बातम्या – 

जडेजामुळे माझं स्थान धोक्यात; ३ कसोटीत २७ विकेट्स घेणाऱ्या ‘या’ गोलंदाजाचा आरोप

‘धोनी फॅमिली’च्या घरात नवीन पाहुणा, पती-पत्नी संगतीनं घेत आहेत खूप काळजी

तब्बल १०९ वर्षापासून ‘या’ गोलंदाजाचा विक्रम आहे अबाधित; एका दिवसात घेतलेल्या दोन हॅट्रिक