आयपीएल फायनलची जगभरात चर्चा! प्रसिद्ध रॅपरनं लावला शाहरुख खानच्या टीमवर कोट्यवधी रुपयांचा सट्टा

इंडियन प्रीमियर लीग (IPL 2024) चा अंतिम सामना आज (26 मे) चेन्नईच्या चेपॉक स्टेडियमवर खेळला जाणार आहे. अंतिम सामन्यात कोलकाता नाईट रायडर्स आणि सनरायझर्स हैदराबादचे संघ आमनेसामने आहेत. दोन्ही संघांनी विजेतेपदासाठी जोरदार तयारी केली आहे. त्यामुळे आजचा सामना निश्चितच रोमांचक होईल, यात काही शंका नाही.

दरम्यान, जगप्रसिद्ध रॅपर ‘ड्रेक’ यानं आयपीएल फायनलमध्ये कोलकाता नाईट रायडर्सच्या विजयावर मोठा सट्टा लावला आहे. वास्तविक, कॅनेडियन रॅपर ड्रेकनं कोलकाता नाईट रायडर्सच्या विजयावर 2 लाख 50 अमेरिकन डॉलर्सचा सट्टा लावला आहे. त्याचा क्रिकेटमधील हा पहिलाच सट्टा आहे. ड्रेकला सट्टेबाजीमध्ये खूप रस आहे आणि त्यानं क्रिकेटपूर्वी इतर अनेक खेळांवर मोठा सट्टा लावला आहे. केकेआरवर पैज लावल्यानंतर ड्रेकनं त्याच्या अधिकृत इंस्टाग्रामवर स्टोरी टाकत त्याचा स्क्रीनशॉट शेअर केला. त्याच्या सट्टेबाजीनंतर चाहत्यांच्या मनात केकेआर आणि सनरायझर्स हैदराबाद यांच्यातील सामन्याबद्दलची उत्सुकता आणखीनच वाढली आहे.

बेटिंगमध्ये खूप सक्रिय असलेल्या ड्रेकनं गेल्या काही महिन्यांत अनेक खेळांवर सट्टा लावला आहे. त्यानं ‘सुपर बाउल’मध्ये कॅन्सस सिटी चीफ्सवर 2.34 दशलक्ष डॉलर्सची पैज लावली आणि जिंकली होती. याव्यतिरिक्त, त्यानं UFC 300 मध्ये ॲलेक्स परेराच्या जमाहल हिलवर पैज लावून 1.2 दशलक्ष डॉलर्स जिंकले होते.

मात्र, बेटिंगमध्ये ड्रेकचे अनेकदा मोठं नुकसानही झालं आहे. हेवीवेट चॅम्पियनशिप बॉक्सिंग विजेतेपदाच्या सामन्यात ड्रेकनं टायसन फ्युरीवर पैज लावली होती. मात्र, या सामन्यात टायसन फ्युरीला अलेक्झांडर उसिककडून पराभव पत्करावा लागला. या सट्ट्यात ड्रेकला 5 लाख 65 हजार डॉलर्सचं नुकसान सहन करावं लागलं होतं.

आता ड्रेकनं कोलकाता नाईट रायडर्सवर बाजी लावली आहे. जर तो जिंकण्यात यशस्वी झाला, तर त्याला मोठा फायदा होईल. जर ड्रेकनं पैज जिंकली तर त्याला अंदाजे 4 लाख 25 हजार डॉलर्स मिळतील. अशा स्थितीत केकेआर संघ विजेतेपद मिळवून ड्रेकची पैज खरी ठरवतो की सनरायझर्स हैदराबाद संघ विजेतेपद पटकावतो हे पाहणे उत्सुकतेचं ठरणार आहे.

महत्त्वाच्या बातम्या – 

आयपीएलच्या फायनलमध्ये ‘हे’ 5 खेळाडू खळबळ माजवू शकतात! ट्रॉफी जिंकण्यासाठी यांना रोखणं गरजेच

2012 ला कोलकातानं याच मैदानावर पटकावलं होतं विजेतेपद! केकेआर पुन्हा रचणार का इतिहास?

सेम टू सेम! श्रेयस अय्यरनं केली सुनील नारायणच्या गोलंदाजी स्टाईलची नक्कल, पाहा व्हायरल VIDEO