आगामी आयसीसी चॅम्पियन्स ट्राॅफीची (ICC Champions Trophy 2025) सुरूवात (19 फेब्रुवारी) पासून होईल. ही मेगा स्पर्धा पाकिस्तानच्या यजमानपदाखाली खेळली जाणार आहे. पण भारतीय संघ सुरक्षेच्या कारणास्तव आपले सर्व सामने दुबईच्या मैदानावर खेळणार आहे. तत्पूर्वी अलिकडेच आंतरराष्ट्रीय क्रिकेटमधून निवृत्ती जाहीर केलेल्या रविचंद्रन अश्विनने (Ravichandran Ashwin) भारतीय संघादबद्दल प्रतिक्रिया दिली आहे. दरम्यान अश्विनने वरूण चक्रवर्ती (Varun Chakravarthy) देखील चॅम्पियन्स ट्राॅफीसाठी भारतीय संघात पाहिजे होता, असे मत व्यक्त केले आहे.
आपल्या यूट्यूब चॅनलवर बोलताना, अश्विनने चक्रवर्तीच्या अलीकडील उत्कृष्ट फॉर्मचे कौतुक केले आणि दुबई येथे होणाऱ्या आयसीसी स्पर्धेसाठी भारतीय संघात उशिरा प्रवेश मिळण्याची शक्यता असल्याचे संकेत दिले. अश्विन म्हणाला, “आपण सर्वजण तो तिथे (चॅम्पियन्स ट्रॉफी संघात) असायला हवा होता का याबद्दल बोलत आहोत, मला वाटते की तो तिथे असण्याची शक्यता आहे, मला वाटते की त्याला त्यात समाविष्ट केले जाऊ शकते. सर्व संघांनी फक्त एकच अंतिम संघ जाहीर केला असल्याने, त्याची निवड अजूनही करता येते.”
यादरम्यान 33 वर्षीय तामिळनाडूचा फिरकी गोलंदाज मंगळवारी (4 फेब्रुवारी) नागपूरमध्ये इंग्लंडविरुद्धच्या 3 सामन्यांच्या वनडे मालिकेपूर्वी भारतीय संघासोबत सराव करताना दिसला. बीसीसीआयने अद्याप त्याच्या वनडेे संघात समावेशाची अधिकृतपणे पुष्टी केलेली नसली तरी, चक्रवर्तीची भारताच्या सराव सत्रात उपस्थिती दर्शवते की निवडकर्ते नामांकन सादर करण्याच्या अंतिम मुदतीपर्यंत चॅम्पियन्स ट्रॉफी संघाबद्दल अंतिम निर्णय घेण्याची शक्यता आहे.
सध्या, भारताने चॅम्पियन्स ट्रॉफी संघात 4 फिरकीपटूंचा समावेश केला आहे. त्यामध्ये रवींद्र जडेजा, अक्षर पटेल, वॉशिंग्टन सुंदर आणि कुलदीप यादव यांचा समावेश आहे. यावर बोलताना अश्विन म्हणाला, “जर एखादा वेगवान गोलंदाज बाहेर गेला आणि वरुण आला तर एक अतिरिक्त फिरकी गोलंदाज असेल, मला माहित नाही की ते कोणाला बाहेर ठेवू इच्छितात, जर ते वरुणला आणण्याचा विचार करत असतील तर आपण वाट पाहू.”
आयसीसी चॅम्पियन्स ट्राॅफीसाठी भारतीय संघ- रोहित शर्मा (कर्णधार), शुबमन गिल, विराट कोहली, श्रेयस अय्यर, केएल राहुल, हार्दिक पांड्या, अक्षर पटेल, वॉशिंग्टन सुंदर, कुलदीप यादव, जसप्रीत बुमराह, मोहम्मद शमी, अर्शदीप सिंग, यशस्वी जयस्वाल, रिषभ पंत, रवींद्र जडेजा
चॅम्पियन्स ट्राॅफीमधील भारतीय संघाचे वेळापत्रक:
20 फेब्रुवारी – भारत विरुद्ध बांगलादेश, दुबई
23 फेब्रुवारी – भारत विरुद्ध पाकिस्तान, दुबई
2 मार्च – भारत विरुद्ध न्यूझीलंड, दुबई
महत्त्वाच्या बातम्या-
भारतीय संघ कसा जिंकणार चॅम्पियन्स ट्राॅफी? माजी क्रिकेटपटूने सांगितले समीकरण
IPL 2025; विराट कोहली RCBचे नेतृत्व करणार का? फ्रँचायझीने दिले मोठे संकेत
IND vs ENG; टी20 मध्ये चमकदार कामगिरी करणाऱ्या स्टार खेळाडूला मिळाले बक्षीस, भारतीय संघात झाला समावेश
