मॅंचेस्टरमध्ये जीव तोडून खेळूनसुद्धा इंग्लंडला सामना ड्रॉ होण्यापासून रोखता आलं नाही. संपूर्ण दिवस गोलंदाजी करूनही इंग्लिश गोलंदाज फक्त दोन भारतीय फलंदाजांनाच बाद करू शकले. तरीही चौथा कसोटी सामना अनिर्णीत राहिला असला, तरी बेन स्टोक्सच्या नेतृत्वाखालील इंग्लंड संघ मालिकेत 2-1 ने आघाडीवर आहे. म्हणजेच आता इंग्लंड ही मालिका हरू शकत नाही.
पाचवा कसोटी सामना 31 जुलैपासून ओव्हल मैदानावर खेळला जाणार आहे. इंग्लंड हा सामना जिंकून मालिका आपल्या नावे करण्याच्या इराद्याने मैदानात उतरणार आहे. याच दरम्यान, इंग्लंडचा माजी वेगवान गोलंदाज स्टुअर्ट ब्रॉडने शेवटच्या कसोटी सामन्यासाठी संघात एक बदल करण्याचा सल्ला दिला आहे. ब्रॉड म्हणतो की, जोफ्रा आर्चरला (Jofra Archer) सलग तीन कसोटीत खेळवणं योग्य ठरणार नाही.
स्टुअर्ट ब्रॉडने (Stuart Broad) स्काय स्पोर्ट्सशी बोलताना जोफ्रा आर्चरला पाचव्या कसोटीत विश्रांती द्यावी असं सुचवलं. त्याचं म्हणणं आहे की, गस एटकिंसनला प्लेइंग इलेव्हनमध्ये स्थान द्यायला हवं. तो म्हणाला, मला वाटतं एटकिंसनने खेळायला हवं. त्याचा फारसा वर्कलोड अजूनपर्यंत नाही, पण आम्हाला त्याला खेळताना बघायचं आहे. मोठ्या संघांविरुद्ध त्याला अजून कसोटी क्रिकेटमध्ये संधी मिळालेली नाही.
ब्रॉड पुढे म्हणाला, ब्रायडन कार्स चौथ्या कसोटीत खूप दमलेला दिसला. त्याने आपलं सर्वस्व पणाला लावलं, पण आता त्याच्या पायात ताकद उरलेली नाही असं जाणवतं आहे. अशा परिस्थितीत एटकिंसनला संधी दिली जावी. जोश टंगने सुरुवातीच्या सामन्यांत खेळ केला होता, पण तो मुख्यतः खालच्या क्रमांकाच्या फलंदाजांना बाद करतो. त्यामुळे आर्चरच्या जागी एक नैसर्गिक पर्याय हवा असेल, तर एटकिंसन योग्य ठरेल.
माजी कर्णधार नासिर हुसैनचंही असंच मत आहे. ते म्हणाले, पाचवा कसोटी सामना एटकिंसनच्या होम ग्राउंडवर होतोय, त्यामुळे त्याला अंतिम 11 मध्ये स्थान दिलं जावं. मला वाटत नाही की, चार वर्षांनी पुनरागमन करणाऱ्या आर्चरला सलग तीन कसोटी सामने खेळवणं योग्य ठरेल. एटकिंसन बर्याच काळानंतर परततोय आणि स्टोक्सही दुखापतीतून जात आहे. पण जर एटकिंसन फिट असेल, तर त्याला नक्की संधी मिळायला हवी.
