श्री मावळी मंडळ ठाणे आयॊजीत ९४ व्या शिवजयंतीउत्सवानिमित्त ६८ व्या राज्यस्तरीय कबड्डी स्पर्धेच्या उद्घाटनाच्या दिवशी पुरुष गटात चेंबूर क्रीडा केंद्र मुंबई उपनगर,अमर हिंद मंडळ मुंबई शहर, नंदकुमार क्रीडा मंडळ ठाणे, केदारनाथ क्रीडा मंडळ मुंबई उपनगर या संघानी दुसऱ्या फेरीत प्रवेश केला. तर, महिला गटात निर्विघ्न स्पोर्ट्स अकॅडमी मुंबई उपनगर, संघर्ष क्रीडा मंडळ मुंबई उपनगर, रा. फ. नाईक विद्यालय नवी मुंबई या संघानी दुसऱ्या फेरीत प्रवेश केला.
पुरुष गटातील पहिल्या सामन्यात मुंबई उपनगरच्या चेंबूर क्रीडा केंद्र या संघाने ठाण्याच्या विजय स्पोर्ट्स क्लब संघाचा अतिशय चुरशीच्या लढतीत ३५-३२ असा ३ गुणांनी निसटता विजय मिळवला. सदर सामन्यात मध्यंतराला चेंबूर क्रीडा केंद्राने २१-९ अशी १२ गुणांची आघाडी घेतली ती आकाश कदम, सागर नार्वेकर यांच्या उत्कुष्ट चढायांमुळे. मध्यंतरानंतर मात्र विजय स्पोर्ट्स क्लब संघाच्या प्रणय पाटील याने खोलवर चढाया करीत आपल्या संघाची गुणसंख्या वाढविली . त्याला धीरज खारपाटील व विजय पाटील यांनी पक्कडीत सुंदर साथ दिली. त्यामुळे शेवटच्या मिनिटापर्यंत सामना अतिशय चुरशीचा झाला. परंतु विजय स्पोर्ट्स क्लब संघ आपला पराभव टाळू शकला नाही.
पुरुष गटातील दुसऱ्या सामन्यात मुंबई शहरच्या अमर हिंद मंडळाने मुंबई उपनगरच्या स्फुर्ती सेवा मंडळाचा २५-२२ असा ३ गुणांनी पराभव करून दुसऱ्या फेरीत प्रवेश केला. सदर सामन्यात मध्यंतराला अमर हिंद मंडळाने १५-९ अशी ६ गुणांची आघाडी घेतली ती सिद्धेश सावरडेकरच्या उत्कुष्ट चढायांमुळे. स्फुर्ती सेवा मंडळाच्या सुहास गौडा याने छान खेळ केला. परंतु तो आपल्या संघाचा पराभव टाळू शकला नाही.
महिला गटातील सामन्यात मुंबई उपनगरच्या निर्विघ्न स्पोर्ट्स अकॅडमि संघाने ठाण्याच्या जय बजरंग क्रीडा मंडळाचा २५-१९ असा ६ गुणांनी पराभव केला. सदर सामन्यात मध्यंतराला निर्विघ्न स्पोर्ट्स अकॅडमि संघाने १३-८ अशी ५ गुणांची घेतली भूमी गोस्वामीच्या सुंदर चढायांमुळे, तिला पक्कडीमध्ये पूनम पवारने चांगली साथ दिली. त्यामुळे सामना संपेपर्यंत निर्विघ्न स्पोर्ट्स अकॅडमि संघाने आपली हि आघाडी राखण्यात यश मिळवले. पराभूत संघाकडून मयुरी बेखंडे हिने एकाकी झुंज दिली.
दिनांक ०३-०५-२०१९ या दिवसाचा उत्कृष्ट खेळाडू म्हणून पुरुष गटात अमर हिंद मंडळाचा सिद्धेश सावरडेकर व महिला गटात निर्विघ्न स्पोर्ट्स अकॅडमी संघाची भूमी गोस्वामी यांची निवड झाली.
सदर स्पर्धेचे उदघाटन मा. श्री. एन. बी. मोटे (उपसंचालक क्रीडा व युवक सेवा मुंबई विभाग) व मा. श्री. विनायक कृष्णाजी गोगटे (उद्योगपती) यांच्या शुभहस्ते झाले . यावेळी विशेष अतिथी मा. श्री. रामनाथ मोटे (माजी आमदार ), मा . श्री. देवरामजी भोईर (नगरसेवक व अध्यक्ष – ठाणे जिल्हा कबड्डी असोसिएशन) व मा. श्री. शरद कलावंत (जिल्हा क्रीडा अधिकारी) त्यांच्याबरोबर संस्थेचे अध्यक्ष श्री. कृष्णा डोंगरे, उपाध्यक्ष श्री. सुधाकर मोरे, चिटणीस श्री.सुनील करंजकर, उप चिटणीस श्री. मिलिंद यादव,खजिनदार श्री. केशव मुकणे, विश्वस्त श्री. सुरेश म्हात्रे,विश्वस्त श्री. जोसेफ फेर्नांडिस, विश्वस्त श्री. प्रभाकर सुर्वे हे उपस्थित होते.
अन्य संक्षिप्त निकाल :
महिला गट :
संघर्ष क्रीडा मंडळ, मुंबई उपनगर (३६) वि. शिवतेज क्रीडा मंडळ, ठाणे (२२)
रा. फ. नाईक विद्यालय, नवी मुंबई (३८) वि. स्नेहविकास क्रीडा मंडळ, मुंबई उपनगर (२८)
श्री राम कबड्डी संघ, पालघर (५३) वि. सन्मित्र क्रीडा मंडळ, मुंबई उपनगर (२६)
पुरुष गट :
नंदकुमार क्रीडा मंडळ, ठाणे (३२) वि. जय भवानी तरुण मंडळ, मुंबई उपनगर (२४)
रेल्वे पोलीस लाईन बॉयस स्पोर्ट्स क्लब, मुं उप (३५) वि. ओम वर्तक नगर स्पोर्ट्स क्लब, ठाणे (०६)
नवरत्न क्रीडा मंडळ, ठाणे (२६) वि. श्री विठ्ठल क्रीडा मंडळ, ठाणे (१८)
महत्त्वाच्या बातम्या –
–विजय क्लब, अशोक मंडळ जिल्हास्तरीय कुमार गट स्पर्धेच्या दुसऱ्या फेरीत
–वारसलेन क्रीडा मंडळ आयोजित कुमार गट भव्य कबड्डी स्पर्धा.