टी20 आंतरराष्ट्रीय क्रिकेटमध्ये भारतीय संघाचा माजी कर्णधार रोहित शर्मा याच्या बादशाहतीचा शेवट झाला आहे. रोहित शर्माचा सर्वाधिक टी20आय सामने खेळण्याचा जागतिक विक्रम आता इतिहासजमा झाला असून, आयर्लंडचा अनुभवी फलंदाज आणि कर्णधार पॉल स्टर्लिंगने हा विक्रम आपल्या नावावर केला आहे. UAE विरुद्ध पहिल्या टी20 सामन्यात मैदानात उतरताच स्टर्लिंगने रोहितचा हा मानाचा विक्रम मोडीत काढला.
रोहित शर्माने 2007 मध्ये टी20 आंतरराष्ट्रीय क्रिकेटमध्ये पदार्पण केले होते. त्यानंतर जवळपास 17 वर्षांच्या कारकिर्दीत त्याने भारतासाठी 159 टी20 सामने खेळले. 2024 च्या टी20 विश्वचषक विजयानंतर रोहितने या फॉर्मेटमधून निवृत्ती घेतली होती. त्याचा हा विक्रम तब्बल दोन वर्षे अबाधित राहिला, मात्र आता आयर्लंडच्या खेळाडूने तो मोडून काढला आहे.
दुबई आंतरराष्ट्रीय क्रिकेट स्टेडियमवर UAE विरुद्ध खेळल्या गेलेल्या सामन्यात पॉल स्टर्लिंगने आपल्या टी20 कारकिर्दीतील 160वा सामना खेळत इतिहास रचला. यासह तो क्रिकेटच्या सर्वात लहान फॉर्मेटमध्ये सर्वाधिक सामने खेळणारा खेळाडू ठरला. मात्र, हा ऐतिहासिक सामना स्टर्लिंगला वैयक्तिक कामगिरीच्या दृष्टीने संस्मरणीय करता आला नाही. तो केवळ 8 धावा करून बाद झाला.
टी20 आंतरराष्ट्रीय क्रिकेटमध्ये सर्वाधिक सामने खेळणाऱ्या खेळाडूंच्या यादीत पॉल स्टर्लिंग आता अव्वल स्थानी पोहोचला आहे. त्यानंतर रोहित शर्मा दुसऱ्या, तर आयर्लंडचाच जॉर्ज डॉकरेल तिसऱ्या स्थानावर आहे. अफगाणिस्तानचा मोहम्मद नबी आणि इंग्लंडचा जोस बटलर हे अनुक्रमे चौथ्या आणि पाचव्या स्थानावर आहेत.
दरम्यान, कसोटी आणि एकदिवसीय क्रिकेटमध्ये मात्र भारताचा महान फलंदाज सचिन तेंडुलकर याचीच बादशाहत कायम आहे. सचिनने आपल्या 23 वर्षांच्या कारकिर्दीत 200 कसोटी आणि 463 एकदिवसीय सामने खेळले असून, हे विक्रम आजही अटळ मानले जातात.
सध्याच्या काळात टी20 आंतरराष्ट्रीय सामन्यांची संख्या झपाट्याने वाढत आहे. त्यामुळे हा नवा विक्रम किती काळ टिकेल, याबाबत प्रश्नचिन्ह आहे. बाबर आझम, हार्दिक पांड्या यांसारखे खेळाडू वेगाने या यादीत पुढे येत असून, भविष्यात 200 टी20आय सामने खेळणारा खेळाडू दिसला तर ते आश्चर्यकारक ठरणार नाही.
