आयपीएल २०२१ च्या दुसऱ्या टप्प्याला यूएईमध्ये १९ सप्टेंबरपासून सुरुवात झाली आहे. दुसऱ्या टप्प्याची सुरुवात होताच विराटने चाहत्यांसाठी दुसरा मोठा धक्का दिला. त्याने यापूर्वी टी२० विश्वचषकानंतर भारतीय टी२० संघाचे कर्णधारपद सोडणार असल्याची घोषणा केली होती. त्यानंतर त्याने पुढच्या वर्षीपासून राॅयल चॅलेंजर्स बेंगलोरचे कर्णधारपद सोडणार असल्याचे जाहीर केले. त्याच्या या दोन मोठ्या निर्णयांनंतर विराटची जागा कोण घेणार असा प्रश्न उपस्थित झाला आहे. विराटच्या या निर्णयानंतर अनेक दिग्गजांनीही प्रतिक्रिया दिल्या आहेत. आता या यादीत आणखी एका दिग्गजाचे नाव सामील झाले आहे.
भारताचे माजी क्रिकटेपटू संजय मांजरेकर यांनी तीन खेळाडूंची नावे सांगितली आहेत, जे भविष्यात आरसीबीचे कर्णधार होऊ शकतात. विराटने आरसीबीचे कर्णधारपद सोडल्यानंतर मांजरेकरांनी आरसीबीच्या कर्णधारपदासाठी जी नावे सांगितली आहेत, त्यामधील एकही खेळाडू आतापर्यंत आरसीबीसाठी खेळलेला नाही. चला तर या तीन खेळाडूंची माहिती घेऊयात, ज्यांची नावे मांजरेकरांनी आरसीबीच्या पुढील कर्णधारपदासाठी घेतली आहेत.
१. कायरन पोलार्ड
कायरन पोलार्ड मर्यादित षटकांमध्ये वेस्ट इंडिज क्रिकेट संघाचा कर्णधार आहे. तो दमदार फलंदाजी करू शकतो. संघासाठी गोलंदाजी करू शकतो आणि उत्कृष्ट क्षेत्ररक्षणही करू शकतो. आयपीएलमध्ये पोलार्डने यापूर्वी अनेकदा मुंबई इंडियन्स संघाचे नेतृत्व केले आहे. तसेच कॅरेबियन प्रीमियर लीगमध्येही कर्णधारपद सांभाळले आहे. एकंदरीत पाहता त्याच्याकडे संघाचे नेतृत्व करण्यासाठी चांगला अनुभव आहे.
२. सूर्यकुमार यादव
आरसीबीच्या पुढच्या कर्णधाराच्या रूपात मांजरेकरांनी मुंबई इंडियन्सच्याच दुसऱ्या एका खेळाडूचे नाव सुचवले आहे. त्यांनी मुंबईचा महत्वाचा फलंदाज सूर्यकुमार यादवचे नावही या तीन खेळाडूंमध्ये घेतले आहे. सूर्यकुमारकडे संघाचे नेतृत्व करण्याचा कसलाच अनुभव नाही, पण तो आयपीएलमध्ये बऱ्याच काळापासून खेळत आहे. अशात मांजरेकरांच्या मते तोही आरसीबीचा पुढचा कर्णधार बनू शकतो.
३. डेविड वाॅर्नर
आरसीबीच्या कर्णधारपदासाठी मांजरेकरांनी तिसरे नाव डेविड वाॅर्नरचे घेतले आहे. वार्नरवर यापूर्वी सनरायझर्स हैदराबाद संघाच्या कर्णधारपदाची जबाबदारी होती आणि त्याच्या नेतृत्वात हैदराबाद संघाने २०१६ मध्ये आयपीएलचे जेतेपद मिळवले होते. विशष म्हणजे, त्यावेळी जेतेपदासाठीच्या अंतिम सामन्यात हैदराबादपुढे आरसीबीचेच आव्हान होते. सध्या वार्नर हैदराबाद संघामध्येच फलंदाजाच्या रूपात खेळत आहे. त्याला कर्णधारपदाचा अनुभव असून तोही भविष्यात आरसीबीचा कर्णधार बनू शकतो
डिव्हिलियर्सहीचेही नाव घेतले, पण…
या तीन खेळाडूंव्यतिरिक्त त्यांनी आरसीबीचा दिग्गज फलंदाज डिव्हिलियर्सचेही नाव घेतले आहे. मात्र, त्यांच्या मते डिव्हिलियर्स आता जास्त काळापर्यंत आरसीबीचे कर्णधारपद सांभाळू शकणार नाही. त्यामुळे हे तीन खेळाडू कर्णधारपदासाठी चांगला पर्याय आहेत.
महत्त्वाच्या बातम्या-
-ज्याने पंजाबच्या तोंडून हिसकावला असता सामना, त्याच खेळाडूचे कर्णधार राहुलने गायले खूप गुणगान
-शमीच्या तेज तर्रार चेंडूने अलगद उडवले केनचे स्टंप्स, व्हिडिओ बघून म्हणाल, नुसता धुरळा…!
-क्रिकेटच्या ग्राउंडचा राजनयात उपयोग करणारे मनमोहन सिंग तुम्हाला माहित आहेत का?
