रविवारी इंग्लंड विरुद्ध पाकिस्तान संघात पार पडलेल्या दुसऱ्या टी२० सामन्यात पाकिस्तानला ५ विकेट्सने पराभव स्विकारावा लागला. यानंतर जगातील दिग्गज वेगवान गोलंदाजांपैकी एक शोएब अख्तर याने पाकिस्तानच्या पराभवाबद्दल निराशा व्यक्त केली आहे. पाकिस्तानचा सध्याचा कर्णधार बाबर आझमवर टीका करताना त्याने त्याला ‘हरवलेली गाय’ असेही म्हटले.
इंग्लंडने कर्णधार ओएन मॉर्गन (६६) आणि डेव्हिड मालन (५४ *) यांच्या ११२ धावांच्या भागीदारीमुळे रविवारी दुसर्‍या टी -२० सामन्यात पाकिस्तानला ५ गडी राखून पराभूत केले. या विजयामुळे यजमानांना तीन सामन्यांच्या मालिकेत १-० अशी आघाडी मिळाली. पहिला सामना पावसामुळे अनिश्चित राहिला होता.
पाकिस्तानकडून झालेल्या या पराभवानंतर माजी वेगवान गोलंदाज शोएब अख्तर खूपच चिडलेला दिसला. बाबर आझमच्या कर्णधारपदावर प्रश्नचिन्ह उपस्थित करीत तो आपल्या यूट्यूब चॅनलवर म्हणाला, “बाबर माझ्यासाठी हरवलेल्या गायीसारखा आहे. तो मैदानावर जातो पण काय करावे हे त्याला कळत नाही. त्यानी स्वत: नेतृत्व केले पाहिजे, जर हरलो तर स्वत: हरलो, जिंकलो तर स्वतः जिंकलो. स्वतःहून निर्णय घ्या जेणेकरून आपण सुधारू शकाल जेणेकरून आगामी काळात अधिक चांगले कर्णधार होण्याची संधी मिळू शकेल.”
अख्तर पुढे म्हणाला, “पाकिस्तानचा संघ जैव ‘असुरक्षित’ बबलमध्ये खेळत आहे, जिथे प्रत्येक खेळाडूला असुरक्षिततेची भावना असते. तो म्हणाला, ‘हा जैव-सुरक्षित बबल नाही तर ‘असुरक्षित’ बबल आहे. संघातील कोणत्याच खेळाडूला काय करावे हे माहित नाही.”
शोएब अख्तर याने संघ व्यवस्थापनावरही प्रश्नचिन्ह उपस्थित केले. दोन्ही संघांमधील मालिकेचा तिसरा आणि अंतिम टी -२० सामना १ सप्टेंबर रोजी खेळला जाईल.
