भारतीय संघाचा कसोटी कर्णधार शुबमन गिलसाठी (Shubman gill) गेल्या काही महिने अतिशय शानदार ठरला आहे. IPL 2025 मध्ये कर्णधार म्हणून स्वतःला सिद्ध करण्याबरोबरच त्याने बॅटनेही भरपूर धावा केल्या. यानंतर त्याला भारतीय कसोटी संघाची कर्णधारपदाची जबाबदारी मिळाली. अँडरसन-तेंडुलकर ट्रॉफी 2025 (Anderson Tendulkar Trophy) मध्येही गिलने उत्तम नेतृत्व करताना बॅटने जबरदस्त खेळी केली. आता कर्णधार गिलला ICC कडून मोठा सन्मान मिळाला असून त्याने इतिहास रचला आहे.
भारतीय संघाचा कर्णधार शुबमन गिलला (Shubman gill) अँडरसन-तेंडुलकर ट्रॉफीतील उत्कृष्ट कामगिरीचे फळ मिळाले आहे. गिलने जुलै महिन्यात 94.50 च्या जबरदस्त सरासरीने 3 सामन्यांत 567 धावा केल्या. यामुळे त्याची ICC प्लेयर ऑफ द मंथसाठी निवड झाली होती. बेन स्टोक्स आणि वियान मुल्डर यांना मागे टाकत गिलने जुलै महिन्याचा ICC प्लेयर ऑफ द मंथ पुरस्कार जिंकला. कर्णधार म्हणूनही त्याने स्वतःला सिद्ध केले असून ही त्याच्या नेतृत्वाखालीली पहिलीच मालिका होती. यासोबतच तो पहिल्या पुरुष क्रिकेटपटूंमध्ये समाविष्ट होत आहे, ज्यांनी हा पुरस्कार 4 वेळा जिंकला आहे.
ICC कडून मिळालेल्या या सन्मानाबद्दल शुबमन गिल म्हणाला, जुलै महिन्यासाठी ICC प्लेयर ऑफ द मंथ निवड झाल्याचा मला खूप आनंद आहे. हा पुरस्कार माझ्यासाठी विशेष आहे कारण हा मला कर्णधार म्हणून माझ्या पहिल्या कसोटी मालिकेतील कामगिरीसाठी मिळाला आहे. बर्मिंगहॅममध्ये केलेला द्विशतक हा नक्कीच माझ्यासाठी अविस्मरणीय क्षण आहे आणि इंग्लंड दौऱ्यातील मुख्य आकर्षणांपैकी एक आहे.
अँडरसन-तेंडुलकर ट्रॉफीबद्दल बोलताना गिल म्हणाला,
इंग्लंडविरुद्धची कसोटी मालिका माझ्यासाठी शिकण्याचा अनुभव होता. दोन्ही संघांनी अप्रतिम कामगिरी केली ज्याची आठवण दोन्ही संघांचे खेळाडू बराच काळ ठेवतील, याची मला खात्री आहे. मला या पुरस्कारासाठी निवडल्याबद्दल ज्युरी मेंबर्सचे आणि संपूर्ण मालिकेत माझ्यासोबत राहिलेल्या सहकाऱ्यांचे मी आभार मानतो. आगामी हंगामातही अशीच कामगिरी करून देशासाठी आणखी सन्मान मिळवण्याची मला उत्सुकता आहे.
