सनरायझर्ससाठी खुशखबर! भुवी आणि विलियम्सनला मिळाले ‘हे’ मानाचे पुरस्कार

क्रिकेटजगताला सध्या क्रिकेटचा फिवर चांगलाच चढला आहे. आंतरराष्ट्रीय क्रिकेटमधील मोठे मोठे खेळाडू या स्पर्धेत आपले नशीब आजमावत आहेत. हैदराबादस्थित फ्रॅंचाईजी सनरायझर्स हैदराबादला आपल्या पहिल्या सामन्यात कोलकाता नाईट रायडर्सकडून पराभव पत्करावा लागला. मात्र, असे असले तरी संघाला दोन चांगल्या बातम्या मिळाल्या आहेत. संघाच्या दोन वरिष्ठ खेळाडूंनी दोन मोठे पुरस्कार मिळाले.

भुवनेश्वरच्या नावे आयसीसीचा पुरस्कार
सनरायझर्स हैदराबादचा उपकर्णधार आणि भारतीय संघाचा प्रमुख वेगवान गोलंदाज भुवनेश्वर कुमार याला आयसीसीचा मार्च महिन्यातील सर्वोत्कृष्ट आंतरराष्ट्रीय क्रिकेटपटूचा पुरस्कार मिळाला. भुवनेश्वरने इंग्लंडविरुद्ध झालेल्या वनडे व टी२० मालिकेत दमदार कामगिरी केली होती. त्याने पाच टी२० मध्ये ६.३८ च्या मामुली इकॉनॉमी रेटने चार बळी आपल्या नावे केले होते. तर, तीन सामन्यांच्या वनडे मालिकेत ४.६५ च्या इकॉनॉमी रेटने ६ बळी मिळवलेले.

भुवनेश्वरने या पुरस्कारानंतर प्रतिक्रिया देताना म्हटले, “मोठ्या कालावधीनंतर संघात परतणे आनंददायी होते. या काळात मी तंदुरुस्ती आणि नवीन काहीतरी शिकण्याचा प्रयत्न केला. संघासाठी पुन्हा खेळून आणि बळी मिळवून उत्साह आला.”

या पुरस्कारासाठी भुवनेश्वरला अफगाणिस्तानचा क्रिकेटपटू राशिद खान व झिम्बावेचा कर्णधार सीन विलयम्स यांचे आव्हान होते. मात्र, अखेरीस भुवनेश्वर या पुरस्काराचा मानकरी बनला.

विलियम्सनला मिळाले रिचर्ड हॅडली मेडल
न्यूझीलंडचा कर्णधार आणि जगातील सर्वोत्तम फलंदाजांपैकी एक केन विलियम्सन देखील हैदराबादकडून आयपीएल खेळतो. उत्कृष्ट कामगिरीबद्दल त्याला सर रिचर्ड हेडली पुरस्काराने गौरविण्यात आले. आपल्या घरच्या मैदानावर चारही कसोटी सामने जिंकण्यात विलियम्सनचा मोलाचा वाटा होता.

त्याने हॅमिल्टन येथे वेस्ट इंडीजविरुद्ध कारकीर्दीतील सर्वोत्कृष्ट २५१ धावा केल्या. त्यानंतर ख्राइस्टचर्चमध्ये पाकिस्तानविरुद्ध आणखी एक दुहेरी शतक ठोकले. चार डावांमध्ये त्याच्या ६३९ धावांनी न्यूझीलंड संघाचे वर्ल्ड टेस्ट चॅम्पियनशिप फायनलचे तिकीट निश्चित केले.

विलियम्सन हा हैदराबादचा मुख्य फलंदाज आहे पण दुखापतीमुळे तो पहिला सामना खेळू शकला नव्हता.

महत्त्वाच्या बातम्या –

Video: मुंबई विरुद्धच्या सामन्यापूर्वी ब्रेंडन मॅक्यूलमने शाकिब अल हसनला दिली खास कॅप, ‘हे’ आहे कारण

तीन कारण की ज्यामुळे चेतन सकारिया बनू शकतो भारतीय संघांचे भविष्य

राजस्थान विरुद्ध पंजाब यांच्यातील चालू सामन्यात अचानक चेंडू झाला निळा, ‘हे’ होते कारण