ब्रेंडन मॅक्युलम यांनी मुख्य प्रशिक्षकपद सोडल्यानंतर, इंग्लंडच्या कसोटी संघाला लवकरच नवीन प्रशिक्षक मिळण्याची शक्यता आहे. न्यूझीलंडचे माजी कर्णधार आणि अनुभवी प्रशिक्षक स्टीफन फ्लेमिंग या पदासाठी आघाडीवर असल्याचे मानले जात आहे. त्यांनी अनेक वर्षे चेन्नई सुपर किंग्सचे मुख्य प्रशिक्षक म्हणून काम पाहिले आहे.
द टेलिग्राफच्या वृत्तानुसार, इंग्लंड कसोटी संघाचे मुख्य प्रशिक्षक म्हणून ब्रेंडन मॅक्युलम यांची जागा घेण्यासाठी फ्लेमिंग शर्यतीत आघाडीवर आहेत.
रिपोर्ट्सनुसार, मुख्य प्रशिक्षकपदाच्या निवड प्रक्रियेत फ्लेमिंग यांनी रिचर्ड डॉसन आणि जोनाथन ट्रॉट यांना मागे टाकले आहे. डिसेंबर २०२६ मध्ये होणाऱ्या दक्षिण आफ्रिका दौऱ्यापासून ते इंग्लंड कसोटी संघाची धुरा सांभाळण्याची शक्यता आहे. त्यावेळी इंग्लंड संघ तीन सामन्यांच्या कसोटी मालिकेसाठी दक्षिण आफ्रिकेचा दौरा करणार आहे.
ब्रेंडन मॅक्युलम यांच्या जाण्यानंतर, ऑगस्ट-सप्टेंबर २०२६ मध्ये पाकिस्तानविरुद्ध होणाऱ्या तीन सामन्यांच्या कसोटी मालिकेसाठी माजी सलामीवीर मार्कस ट्रेस्कोथिक यांची इंग्लंडचे हंगामी मुख्य प्रशिक्षक म्हणून नियुक्ती करण्यात आली आहे.
नियुक्ती झाल्यास, डंकन फ्लेचर, अँडी फ्लॉवर, ट्रेव्हर बेलिस आणि ब्रेंडन मॅक्युलम यांच्यानंतर स्टीफन फ्लेमिंग हे इंग्लंड कसोटी संघाचे पाचवे परदेशी मुख्य प्रशिक्षक ठरतील.
न्यूझीलंडचे सर्वात यशस्वी कसोटी कर्णधार असलेल्या स्टीफन फ्लेमिंग यांनी अद्याप कोणत्याही राष्ट्रीय संघाचे प्रशिक्षकपद भूषवलेले नाही. मात्र, त्यांना फ्रँचायझी क्रिकेटचा मोठा अनुभव आहे.
२००८ मध्ये त्यांनी खेळाडू म्हणून चेन्नई सुपर किंग्जसाठी आयपीएलमध्ये सहभाग घेतला होता. त्यानंतर, २००९ ते २०२६ या काळात त्यांनी संघाचे मुख्य प्रशिक्षक म्हणून काम पाहिले.
२०१६ आणि २०१७ मध्ये चेन्नई सुपर किंग्जवर बंदी असताना, त्यांनी रायझिंग पुणे सुपरजायंटचे मुख्य प्रशिक्षक म्हणून काम केले होते. याव्यतिरिक्त, त्यांनी SA20 लीगमधील ‘जोहान्सबर्ग सुपर किंग्स’ आणि मेजर लीग क्रिकेटमधील ‘टेक्सास सुपर किंग्ज’ यांसारख्या फ्रँचायझी संघांचे मुख्य प्रशिक्षक म्हणून काम केले आहे.
फ्लेमिंग यांना इंग्लिश क्रिकेटचाही दांडगा अनुभव आहे. खेळाडू म्हणून त्यांनी यॉर्कशायरचे प्रतिनिधित्व केले. नॉटिंगहॅमशायरला काउंटी चॅम्पियनशिपचे विजेतेपद मिळवून देण्यात नेतृत्व केले. प्रशिक्षक म्हणून, त्यांनी २०२३ आणि २०२४ मध्ये ‘द हंड्रेड’ (The Hundred) स्पर्धेत ‘सदर्न ब्रेव्ह’ (Southern Brave) संघाला बाद फेरीत (नॉकआउट स्टेज) पोहोचवण्यात मोलाची भूमिका बजावली.
