आयपीएल 2025 मधील 63वा सामना मुंबई इंडियन्स विरूद्ध दिल्ली कॅपिटल्स (MI vs DC) संघात खेळला गेला. या सामन्यात मुंबईचा विस्फोटक फलंदाज सूर्यकुमार यादवने (Suryakumar Yadav) टी20 क्रिकेट इतिहासात एक ऐतिहासिक विक्रम केला आहे. सूर्याने दिल्ली कॅपिटल्सविरुद्ध 43 चेंडूत 73 धावांची खेळी खेळून हा विक्रम केला. प्लेऑफच्या दृष्टिकोनातून मुंबईसाठी हा सामना खूप महत्त्वाचा होता आणि सूर्यकुमार अजूनही ऑरेंज कॅपच्या शर्यतीत आहे. या हंगामात त्याने 13 सामन्यांमध्ये 583 धावा केल्या आहेत. सूर्यकुमार यादव आता टी20 क्रिकेटमध्ये सर्वाधिक वेळा 25 पेक्षा जास्त धावा करणारा खेळाडू बनला आहे.
सूर्यकुमार यादवने दिल्ली कॅपिटल्सविरुद्ध 73 धावा केल्या. त्याने आता सलग 13 टी-20 सामन्यांमध्ये 25 पेक्षा जास्त धावा केल्या आहेत. याबतीत, त्याने दक्षिण आफ्रिकेचा खेळाडू टेम्बा बावुमाची बरोबरी केली आहे. सूर्या आणि बावुमा यांनी सलग 13 टी-20 सामन्यांमध्ये 25 पेक्षा जास्त धावा करण्याचा पराक्रम केला आहे.
सूर्याने यंदाच्या आयपीएल हंगामात 13 डावांमध्ये फलंदाजी केली आहे. दरम्यान त्याने प्रत्येक वेळी 25 पेक्षा जास्त धावा केल्या आहेत. या हंगामात त्याची सर्वोच्च धावसंख्या 73 धावा आहे, जी त्याने दिल्लीविरुद्ध केली. त्याच वेळी, या हंगामात त्याची सर्वात कमी धावसंख्या 26 धावा होत्या, ज्या त्याने सनरायझर्स हैदराबादविरुद्ध केल्या. या हंगामात सूर्याने 4 अर्धशतकंही झळकावली आहेत.
सूर्यकुमार यादवने या हंगामात त्याच्या आयपीएल कारकिर्दीत 4,000 धावाही पूर्ण केल्या आहेत. आयपीएल 2025 सुरू होण्यापूर्वी त्याने 150 आयपीएल सामन्यांमध्ये 3,594 धावा केल्या होत्या. चालू हंगामात 406 धावा करून त्याने 4,000 धावांचा टप्पा गाठला होता. सूर्यकुमार यादवने आतापर्यंत त्याच्या आयपीएल कारकिर्दीत 4,177 धावा केल्या आहेत.
