भारतीय टी20 संघाचा कर्णधार सूर्यकुमार यादव सध्या स्पोर्ट्स हर्नियाच्या शस्त्रक्रियेनंतर रिकव्हरीच्या प्रक्रियेत आहे. लंडनमध्ये ही शस्त्रक्रिया करण्यात आली असून ती यशस्वी ठरली आहे. याची माहिती खुद्द सूर्यकुमार यादवने इन्स्टाग्रामवर दिली आहे.
त्याने हॉस्पिटलमधील फोटो शेअर करत लिहिले, “लाइफ अपडेट: पोटाच्या उजव्या खालच्या भागात स्पोर्ट्स हर्नियाची शस्त्रक्रिया झाली आहे. आता मी बरा होण्याच्या मार्गावर आहे. लवकरात लवकर परत येण्याची प्रतीक्षा आहे.”
Suryakumar Yadav's surgery has been successful.
— Tanuj (@ImTanujSingh) June 26, 2025
– Wishing him for a speedy recovery.🤞👊 pic.twitter.com/1nJQ55O4YB
आयपीएल 2025 संपल्यानंतर लगेचच सूर्यकुमार लंडनला गेला आणि उपचार घेतले. ही शस्त्रक्रिया यशस्वी झाली असून सध्या तो आराम करत आहे. जरी त्याच्या पुनरागमनाची अधिकृत तारीख घोषित झालेली नाही, तरी ऑगस्टपर्यंत तो फिट होईल, असा अंदाज व्यक्त केला जात आहे.
दरम्यान, भारतीय संघ सध्या इंग्लंडविरुद्ध कसोटी मालिकेत व्यस्त असून ही मालिका 4 ऑगस्टला संपणार आहे. त्यानंतर 17 ऑगस्टपासून टीम इंडिया बांगलादेश दौऱ्यावर जाणार आहे, जिथे तीन वनडे आणि तीन टी20 सामने खेळवले जातील. सूर्यकुमार यादव या टी20 मालिकेत पुनरागमन करू शकतो.
स्पोर्ट्स हर्नियातून सावरण्यासाठी साधारणतः 6-8 आठवडे लागतात. त्यामुळे सूर्यकुमार ऑगस्टमध्ये पूर्णपणे तंदुरुस्त होऊन भारतीय संघात पुनरागमन करेल, अशी अपेक्षा आहे. त्यांच्या अनुपस्थितीत टीम इंडियाला नव्या संयोजनात खेळावे लागणार असून संघ व्यवस्थापनासाठी ही एक मोठी जबाबदारी असेल.
सूर्यकुमार यादव गेल्या काही वर्षांत भारताचा सर्वात विश्वासू आणि आक्रमक टी20 फलंदाज ठरला आहे. त्याच्या फिनिशिंग क्षमतेने संघाला अनेक वेळा विजय मिळवून दिला आहे. त्यामुळे त्याचे लवकर पुनरागमन हे संघासाठी खूपच सकारात्मक बाब असेल.
