टी20 वर्ल्ड कप 2026 ची सुरुवात 7 फेब्रुवारीपासून होणार असून अंतिम सामना 8 मार्च रोजी खेळवला जाणार आहे. यंदाच्या स्पर्धेत एकूण 20 संघ सहभागी होत आहेत. भारतीय संघही आपला वर्ल्ड कप प्रवास 7 फेब्रुवारी रोजीच सुरू करणार असून भारताचा पहिला सामना यूएसएविरुद्ध होणार आहे. वर्ल्ड कपच्या पहिल्याच दिवशी चाहत्यांना क्रिकेटचा भरपूर थरार पाहायला मिळणार आहे, कारण त्या दिवशी एकूण तीन सामने खेळवले जाणार आहेत.
पहिल्या दिवशी भारत-यूएसए यांच्यातील सामना रंगणार आहे, तर कोलंबो येथे पाकिस्तान आणि नेदरलँड्स आमनेसामने असतील. याशिवाय, वेस्टइंडीज आणि स्कॉटलंड हे संघही 7 फेब्रुवारी रोजीच आपला पहिला सामना खेळतील. अशा वातावरणात टी20 वर्ल्ड कपच्या इतिहासात सर्वाधिक धावा करणाऱ्या फलंदाजांची चर्चा पुन्हा एकदा रंगू लागली आहे.
टी20 वर्ल्ड कप इतिहासातील सर्वाधिक धावा करणारे टॉप-5 फलंदाज
विराट कोहली
टी20 वर्ल्ड कपच्या इतिहासात सर्वाधिक धावा करणारा फलंदाज म्हणजे भारताचा स्टार विराट कोहली. कोहलीने 35 सामन्यांतील 33 डावांत 58.72 च्या सरासरीने आणि 128.81 च्या स्ट्राइक रेटने 1292 धावा केल्या आहेत. या दरम्यान त्याने 12 अर्धशतके ठोकली आहेत.
रोहित शर्मा
भारताचा माजी कर्णधार रोहित शर्मा या यादीत दुसऱ्या क्रमांकावर आहे. रोहितने 47 सामन्यांतील 44 डावांत 34.85 च्या सरासरीने आणि 133.04 च्या स्ट्राइक रेटने 1220 धावा केल्या आहेत. त्याचा सर्वोच्च स्कोअर 92 धावा आहे आणि त्याने 12 अर्धशतके नोंदवली आहेत.
महेला जयवर्धने
श्रीलंकेचा माजी दिग्गज फलंदाज महेला जयवर्धने तिसऱ्या स्थानावर आहे. त्याने 31 सामन्यांत 1016 धावा केल्या असून त्याची सरासरी 39.07 आणि स्ट्राइक रेट 134.74 आहे. जयवर्धनेच्या नावावर एक शतक आणि 6 अर्धशतके आहेत.
जोस बटलर
इंग्लंडचा विकेटकीपर-फलंदाज जोस बटलरने 35 सामन्यांतील 34 डावांत 1013 धावा केल्या आहेत. त्याचा सरासरी 42.20 आणि स्ट्राइक रेट 147.23 इतका आहे. बटलरने एक शतक आणि 5 अर्धशतके ठोकली आहेत.
डेव्हिड वॉर्नर
ऑस्ट्रेलियाचा माजी सलामीवीर डेव्हिड वॉर्नर पाचव्या क्रमांकावर आहे. त्याने 41 सामन्यांत 984 धावा केल्या असून त्याचा सरासरी 25.89 आणि स्ट्राइक रेट 134.24 आहे. वॉर्नरच्या नावावर 8 अर्धशतके आहेत.
