टी-20 वर्ल्ड कप 2026 (ICC T20 international world cup 2026) सुरू होण्यापूर्वी सर्व संघांना आपली तयारी तपासण्यासाठी सराव सामने खेळण्याची संधी मिळत आहे. 4 फेब्रुवारी रोजी झालेल्या सराव सामन्यांमध्ये काही मोठे फेरबदल आणि नाट्यमय घडामोडी पाहायला मिळाल्या.
बंगळुरू येथील बीसीसीआय ‘सेंटर ऑफ एक्सिलेंस’ मध्ये झालेल्या सामन्यात अफगाणिस्तानने दोनवेळा विश्वविजेते राहिलेल्या वेस्ट इंडिजला एकतर्फी मात दिली. प्रथम फलंदाजी करताना अफगाणिस्तानने 20 षटकांत 6 बाद 182 धावा केल्या. इब्राहिम जादरानने 51, तर रहमनुल्लाह गुरबाजने 43 धावांचे योगदान दिले. 183 धावांच्या लक्ष्याचा पाठलाग करताना विंडीजची सुरुवात खराब झाली. 38 धावांतच त्यांचे 4 गडी बाद झाले होते. मॅथ्यू फोर्डेच्या नाबाद 52 धावांच्या खेळीमुळे विंडीजचा संघ 7 बाद 159 धावांपर्यंत पोहोचू शकला. अफगाणिस्तानने हा सामना 23 धावांनी जिंकला. अजमतुल्लाह उमरजई आणि मुजीब उर रहमान यांनी प्रत्येकी 2 बळी घेतले.
पाकिस्तानचा संघ विश्वचषकासाठी कोलंबोमध्ये पोहोचला असून 4 फेब्रुवारीला त्यांचा आयर्लंडविरुद्ध सराव सामना होता. खराब हवामान आणि पावसामुळे हा सामना नाणेफेक (Toss) न होताच रद्द करण्यात आला. पाकिस्तानला त्यांचे सर्व ग्रुप सामने कोलंबोमध्येच खेळायचे आहेत, त्यामुळे आगामी काळात पाऊस त्यांच्यासाठी मोठी अडचण ठरू शकतो.
बांगलादेशच्या जागी संधी मिळालेल्या स्कॉटलंडचा सामना नामीबियाशी झाला. नामीबियाने प्रथम फलंदाजी करताना 20 षटकांत फक्त 4 गड्यांच्या मोबदल्यात 226 धावांचा डोंगर उभा केला. स्कॉटलंडने या मोठ्या लक्ष्याचा पाठलाग करताना चोख प्रत्युत्तर दिले, पण त्यांना 20 षटकांत 5 बाद 220 धावाच करता आल्या. नामीबियाने हा सामना 6 धावांनी जिंकला.
अफगाणिस्तानने विंडीजला हरवून आपली ताकद दाखवून दिली आहे, तर पाकिस्तानच्या तयारीमध्ये पावसाने अडथळा निर्माण केला आहे.
