एक किंवा दोन नव्हे, तर सोडले ‘इतके’ झेल! क्षेत्ररक्षण बनले भारतीय संघासाठी मोठे डोकेदुखी

India vs England Test: कसोटी क्रिकेटमध्ये कोणत्याही संघासाठी चांगली फलंदाजी आणि गोलंदाजी जेवढी महत्त्वाची असते, तेवढीच क्षेत्ररक्षणाची भूमिकाही महत्त्वाची असते. सेना (दक्षिण आफ्रिका, इंग्लंड, न्यूझीलंड, ऑस्ट्रेलिया) देशांमध्ये कसोटी सामन्यांमध्ये जर एखाद्या संघाचे स्लिपमध्ये उभे असलेले क्षेत्ररक्षक चांगले नसतील, तर त्यांना सामन्यात टिकून राहणे खूप कठीण होते. असेच काहीसे भारत आणि इंग्लंड यांच्यातील लीड्सच्या मैदानावर खेळल्या जात असलेल्या मालिकेतील पहिल्या कसोटी सामन्यात पाहायला मिळाले आहे. (IND vs ENG Leads Test)

भारतीय संघाचा युवा सलामीवीर फलंदाज यशस्वी जयस्वाल जो फलंदाजीमध्ये शतक झळकावण्यात यशस्वी ठरला, परंतु क्षेत्ररक्षणाच्या बाबतीत तो या सामन्यात पूर्णपणे कमजोर दिसून आला आहे, ज्याचा फटका भारतीय संघाला या सामन्यात आतापर्यंत सहन करावा लागला आहे.

लीड्स कसोटी सामन्याची जेव्हा सुरुवात झाली, तेव्हा भारतीय संघाच्या फलंदाजांचे उत्कृष्ट प्रदर्शन पाहायला मिळाले. त्याचबरोबर गोलंदाजांकडूनही अशाच प्रदर्शनाची सर्वांना अपेक्षा होती, यासाठी त्यांना क्षेत्ररक्षकांकडूनही साथ मिळणे आवश्यक होते. पण, असे काहीही होताना दिसले नाही. यशस्वी जयस्वालने या सामन्यात आतापर्यंत एकूण 3 झेल सोडले आहेत आणि तिन्ही भारतीय सघाला महागात पडले आहेत. (Yashasvi Jaiswal Dropped Catches)

दुसऱ्या दिवसाच्या खेळात जेव्हा यशस्वीने इंग्लंड संघाचा सलामीवीर फलंदाज बेन डकेटचा गलीमध्ये क्षेत्ररक्षण करताना सोपा झेल सोडला, तेव्हा तो 15 धावांवर होता. यानंतर डकेट 62 धावांची खेळी करून बाद झाला. दुसऱ्या दिवसाच्या खेळात यशस्वी जयस्वालने जसप्रीत बुमराहच्या गोलंदाजीवर स्लिपमध्ये ओली पोपचा झेल सोडला होता, जेव्हा तो 62 धावांवर फलंदाजी करत होता. नंतर पोप शतक झळकावण्यात यशस्वी झाला. तिसऱ्या दिवसाच्या खेळात यशस्वीने तिसरा झेल हॅरी ब्रूकचा सोडला, जो 82 धावांवर होता, पण नंतर ब्रूक 99 धावांवर बाद झालाच.

इंग्लंडचा संघ लीड्स कसोटी सामन्यात आपल्या पहिल्या डावात 465 धावा काढून सर्वबाद झाला, ज्यात ते भारतीय संघाच्या पहिल्या डावातील 471 धावांच्या तुलनेत फक्त 6 धावांनी मागे राहिले. इंग्लंडकडून फलंदाजीत ओली पोप 106 धावांवर तर हॅरी ब्रूक 99 धावांवर बाद झाला. भारताकडून गोलंदाजीत जसप्रीत बुमराहने 5 विकेट्स घेतल्या, तर प्रसिद्ध कृष्णाने 3 आणि सिराजने 2 विकेट्स आपल्या नावावर केल्या. (Jasprit Bumrah 5 Wicket Haul)