वेस्ट इंडिज दौऱ्यावर ऑस्ट्रेलियन संघाची उत्कृष्ट कामगिरी सुरूच आहे. यजमान वेस्ट इंडिजला कसोटी मालिकेत धुमाकूळ घातल्यानंतर, ऑस्ट्रेलियन संघ आता टी-20 मालिकेत आपली ताकद दाखवत आहे. पहिले 2 टी-२० सामने जिंकल्यानंतर, ऑस्ट्रेलियन संघ सेंट किट्समध्ये तिसरा टी-20 सामना खेळण्यासाठी आला होता, ज्यामध्ये टिम डेव्हिडने धुमाकूळ घातला आहे. टिम डेव्हिडने धमाकेदार शैलीत फलंदाजी करताना विक्रमांची रेलचेल केली. डेव्हिडने प्रथम 16 चेंडूत अर्धशतक झळकावून मार्कस स्टोइनिस आणि ट्रॅव्हिस हेडचा विक्रम मोडला.
डेव्हिड ऑस्ट्रेलियाकडून टी-20 सामन्यात सर्वात जलद अर्धशतक झळकावणारा फलंदाज बनला आहे. यापूर्वी हा विक्रम मार्कस स्टोइनिस आणि ट्रॅव्हिस हेडच्या नावावर होता. दोघांनीही 17-17 चेंडूत ही कामगिरी केली होती. ऑस्ट्रेलियासाठी सर्वात जलद टी-20 सामन्यात अर्धशतक झळकावल्यानंतरही, टिम डेव्हिडच्या बॅटवरून चौकार आणि षटकारांचा पाऊस पडत राहिला. परिणामी डेव्हिडने फक्त 37 चेंडूत शतक पूर्ण केले.
डेव्हिडने त्याच्या टी-20 कारकिर्दीतील पहिले शतक 11 षटकार आणि फक्त 6 चौकारांच्या मदतीने ठोकले. अशाप्रकारे, तो ऑस्ट्रेलियाकडून टी-20 मध्ये सर्वात जलद शतक करणारा फलंदाज बनला. इतकेच नाही तर, टिम डेव्हिड आता पूर्ण सदस्य राष्ट्रांच्या यादीत टी-20 मध्ये सर्वात जलद शतक करणारा संयुक्त तिसऱ्या क्रमांकाचा फलंदाज आहे. त्याने भारताच्या अभिषेक शर्माच्या विक्रमाची बरोबरी केली.
सर्वात जलद टी-20 शतक करणारा फलंदाज (पूर्ण सदस्य राष्ट्र)
डेव्हिड मिलर – 35
रोहित शर्मा – 35
अभिषेक शर्मा – 37
टिम डेव्हिड – 37
जॉन्सन चार्ल्स – 39
टिम डेव्हिडच्या झंझावाती शतकाच्या जोरावर ऑस्ट्रेलियाने वेस्ट इंडिजचा पराभव केला. अशाप्रकारे, पाहुण्या संघाने 5 सामन्यांच्या टी-20 मालिकेत 3-0 अशी अजिंक्य आघाडी घेतली. ऑस्ट्रेलियाने 215 धावांचे मोठे लक्ष्य केवळ 16.1 षटकांत पूर्ण केले. टिम डेव्हिडने 102 धावा काढल्यानंतर नाबाद राहिला तर मिचेल ओवेनने 16 चेंडूत 2 चौकार आणि 3 षटकारांसह 36 धावांची नाबाद खेळी केली. टिम आणि ओवेनमध्ये चौथ्या विकेटसाठी 128 धावांची शानदार भागीदारी झाली. 215 धावांच्या लक्ष्याचा पाठलाग करताना ऑस्ट्रेलियाचा धावसंख्या एकेकाळी 3 बाद 61 धावांवर होता, त्यानंतर टिम डेव्हिड आला आणि त्याने एक सनसनाटी खेळी केली आणि आपल्या संघाला संस्मरणीय विजय मिळवून दिला.
