भारतीय वेगवान गोलंदाज मोहम्मद शमीचा आज वाढदिवस आहे. टीम इंडियासाठी अविस्मरणीय कामगिरी करणाऱ्या या अनुभवी खेळाडूच्या नावावर अनेक अनोखे विक्रम आहेत. वनडेपासून आयपीएल आणि आयसीसी स्पर्धांपर्यंत शमीने आपल्या घातक गोलंदाजीने सर्वांना चकित केले आहे. चला तर पाहूया त्याचे 5 मोठे पराक्रम-
सर्वात जलद 100 आणि 200 विकेट्स
मोहम्मद शमी हा भारतासाठी सर्वात जलद 100 आणि 200 वनडे विकेट्स घेणारा गोलंदाज ठरला आहे. त्याने फक्त 56 सामन्यांत 100 विकेट्स पूर्ण केल्या, तर 104 सामन्यांत 200 विकेट्स घेतल्या. सध्या त्याच्या खात्यात 108 वनडे सामन्यांत 206 विकेट्स जमा आहेत.
वनडेमधील सर्वाधिक ‘फायफर’
शमी वनडे क्रिकेटमध्ये भारतासाठी सर्वाधिक पाच विकेट्स हॉल घेणारा गोलंदाज आहे. 2013 साली डेब्यू केलेल्या शमीने आतापर्यंत 6 वेळा हा पराक्रम केला आहे.
आयपीएलमधील विक्रमी कामगिरी
आयपीएल 2023 हंगामात गुजरात टायटन्सकडून खेळताना शमीने पॉवरप्लेमध्ये विक्रमी 17 विकेट्स घेतल्या. संपूर्ण हंगामात त्याने 28 विकेट्स झळकावल्या आणि ‘पर्पल कॅप’ आपल्या नावावर केली.
वर्ल्ड कपमधील धमाका
2023 मध्ये भारतात झालेल्या आयसीसी वनडे वर्ल्ड कपमध्ये शमीने 24 विकेट्स मिळवून विक्रमी कामगिरी केली. हा भारतासाठी एका वर्ल्ड कप संस्करणातील सर्वाधिक विकेट्सचा विक्रम आहे. एकूण यादीत तो तिसऱ्या स्थानी आहे.
जगातील एकमेव गोलंदाज
शमी आयसीसी स्पर्धांमध्ये 5 वेळा फायफर घेणारा जगातील एकमेव गोलंदाज आहे. त्याने पाचवा फायफर यावर्षी चॅम्पियन्स ट्रॉफीमध्ये बांगलादेशविरुद्ध घेतला. मार्च 2025 मध्ये न्यूझीलंडविरुद्ध झालेल्या चॅम्पियन्स ट्रॉफी फायनलमध्ये त्याने भारतासाठी शेवटचा सामना खेळला. त्या सामन्यात भारताने विजय मिळवून ट्रॉफीवर नाव कोरले.
