‘मुंबई त्याचं करिअर बर्बाद करतेय’, अर्जुन तेंडुलकरला संधी न दिल्याने संतापले नेटकरी, मिम्सही व्हायरल

जगातील सर्वात मोठी टी२० लीग असलेल्या आयपीएलमध्ये खेळण्यासाठी खेळाडू संधीच शोधत असतात. युवा खेळाडूंसाठी ही लीग खूपच महत्त्वाची असते. कारण, या स्पर्धेत जर त्यांनी चमकदार कामगिरी केली, तर त्यांना राष्ट्रीय संघात संधी मिळण्याची शक्यता जरा जास्तच असते. मात्र, जर एखादा खेळाडू २ हंगाम संघात असेल आणि त्याला एकाही सामन्यात खेळण्याची संधीच मिळत नसेल, तेव्हा मात्र त्याच्या स्वप्नांना तडा बसण्याची शक्यताही जास्त असते. असेच काहीसे सध्या मुंबई इंडियन्स संघाचा युवा गोलंदाज अर्जुन तेंडुलकर याच्याबाबत घडताना दिसत आहे.

मुंबई इंडियन्स (Mumbai Indians) संघाने शनिवारी (दि. २१ मे) मुंबईच्या वानखेडे स्टेडिअमवर दिल्ली कॅपिटल्स (Delhi Capitals) संघाविरुद्ध हंगामातील आपला शेवटचा सामना खेळला. या सामन्यात मुंबई संघ अर्जुन तेंडुलकर (Arjun Tendulkar) याला खेळण्याची संधी देईल अशी चर्चा होती. मात्र, तसे काहीच झाले नाही. अर्जुनला पदार्पणाची संधी मिळालीच नाही. नाणेफेकीपूर्वी अर्जुनच्या हावभावांवरून असे वाटत होते की, त्याला संधी मिळेल. मात्र, रोहितने नाणेफेक जिंकून प्लेईंग इलेव्हनबाबत जेव्हा खुलासा केला, तेव्हा त्यात अर्जुन तेंडुलकरच्या नावाचा समावेश नव्हता. रोहितने नाणेफेक जिंकून पहिल्यांदा गोलंदाजी करण्याचा निर्णय घेतला, तेव्हा २ बदल सांगितले.

अर्जुनला या हंगामातही पदार्पणाची संधी मिळाली नाही. त्याला आयपीएल २०२२च्या मेगा लिलावात मुंबईने ३० लाखात खरेदी केले होते. मात्र, त्याला एकाही सामन्यात खेळवले नाही. मुंबईने जवळपास आपल्या सर्व खेळाडूंना संधी दिली, पण अर्जुनला पदार्पणापासून वंचित ठेवले. अशात पुन्हा एकदा अर्जुनला पदार्पणाची संधी न दिल्यामुळे नेटकरी मुंबईला ट्रोल करत आहेत. ट्विटरवरही अनेक प्रतिक्रिया उमटत आहेत.