क्रिकेटमध्ये जेव्हा एखादा गोलंदाज 5 विकेट्स घेतो, तेव्हा त्याला त्या सामन्याचा बॉल देण्यात येतो. पण एकाच वेळी दोन गोलंदाजांनी एकाच डावात प्रत्येकी 5-5 विकेट्स घेतल्या, तेव्हा बॉल कोणाकडे राहतो? इंग्लंडचे जोश टंग आणि ओली रॉबिन्सन यांच्या बाबतीत नेमके हेच घडले आहे. यावर दोघांनी एक अनोखा मार्ग शोधून काढला आहे.
इंग्लंड आणि पाकिस्तान यांच्यात तीन सामन्यांची कसोटी मालिका खेळली जात आहे. यातील पहिला सामना बुधवारपासून (19 ऑगस्ट) हेडिंग्ले येथे खेळला जात आहे. यामध्ये पाकिस्तानच्या पहिल्या डावात इंग्लंडच्या वेगवान गोलंदाजीचा कहर पाहायला मिळाला. जोश टंग आणि ओली रॉबिन्सन दोघांनी मिळून 10 विकेट्स घेतले आणि पाकिस्तानचा पहिला डाव 171 धावांवर संपुष्टात आला.
रॉबिन्सनने 51 धावा देत 5 विकेट्स आणि टंगने 46 धावा देत 5 विकेट्स घेतल्या. पाकिस्तानविरुद्ध एकाच डावात पाच विकेट्स घेणारी इंग्लंडची ही पहिलीच वेगवान गोलंदाजांची जोडी ठरली आहे. इंग्लंडच्या इतिहासात एकाच डावात पाच विकेट्स घेण्याची कामगिरी करण्याची ही 11 वी वेळ आहे, तर 1998 नंतर पहिलीच वेळ आहे. तसेच पाकिस्तानविरुद्ध इंग्लंडची अशी कामगिरी करण्याची ही चौथी वेळ, तर 2006 नंतर पहिल्यांदाच घडले आहे.
दोघांनी चेंडू अर्धा कापत शेअर केला
चमकदार कामगिरीनंतर सामना चेंडू कोणाला मिळेल, हा प्रश्न निर्माण झाला. यासाठी एक निर्णय घेण्यात आला, जो त्यांच्या दोघांच्या स्मरणात तर राहिलच, मात्र क्रिकेट रसिकही विसरणार नाहीत. त्यांनी सामन्याच्या त्या चेंडूचे दोन तुकडे केले आणि वाटून घेतला.
ही कल्पना रॉबिन्सनला सुचली. त्याने सामन्यानंतर बीबीसी टेस्ट मॅच स्पेशलवर सांगितले, “क्रिकेटच्या चेंडूचे फारसे अर्धे तुकडे होत नाहीत, त्यामुळे ही एक अशी गोष्ट असेल जी आम्ही कधीही विसरणार नाही.”
यावर जोश म्हणाला, “रॉबो म्हणाला की आपण चेंडूचे दोन भाग करू शकतो. मैदानावर काम करणाऱ्या कर्मचाऱ्यांनी तसे करून दिले आहे. असे घडताना मी पहिल्यांदाच पाहिले आहे. मी तो नक्कीच कुठेतरी लावून ठेवेन, याची मला खात्री आहे.”
या मालिकेत इंग्लंडचे नेतृत्व जो रूट करत आहे, तर बाबर आझमच्या अनुपस्थितीत सलमान आगाला पाकिस्तानच्या नेतृत्वाची जबाबदारी मिळाली आहे.
(ENG vs Pak 1st test Josh Tongue and Ollie Robinson split match ball in half after taking 5 wickets hauls)
