Virat Kohli Records: विराट कोहली टी20 आंतरराष्ट्रीय क्रिकेटपासून दूर होऊन 1 वर्षापेक्षा जास्त काळ झाला आहे. तसेच, त्याने कसोटी क्रिकेटमधून निवृत्तीची घोषणा करूनही 2 महिने उलटले आहेत. असे असूनही, विराट रेकाॅर्ड मोडण्यात मागे नाही. आयसीसीने बुधवारी जाहीर केलेल्या ताज्या टी20 रेटिंग पॉईंट्समध्ये कोहलीने 909 गुण मिळवून इतिहास रचला आहे. विराट क्रिकेटच्या तिन्ही फॉरमॅटमध्ये 900 रेटिंग गुण मिळवणारा जगातील एकमेव फलंदाज बनला आहे. कोहलीचा हा रेकाॅर्ड मोडणे कोणासाठीही सोपे असणार नाही. (Only Batsman in All 3 Formats with 900+ Ratings)
विराट कोहलीने 2024च्या आयसीसी टी20 विश्वचषकाच्या फायनल सामन्यात मॅच विनिंग 76 धावांची खेळी केल्यानंतर या फॉरमॅटमधून निवृत्तीची घोषणा केली होती. टी20 मध्ये त्याचे रेटिंग आधी 897 होते, जे आता वाढून 909 झाले आहे. विस्डेनच्या मते, टी20 आंतरराष्ट्रीय क्रिकेटमध्ये हे कोणत्याही फलंदाजाचे तिसरे सर्वोत्तम रेटिंग पॉईंट आहेत. त्याच्या पुढे टी20 मध्ये इंग्लंडचा डेव्हिड मलान (919) आणि भारताचा सूर्यकुमार यादव (912) आहेत.
विराट कोहलीने 2018 मध्ये कसोटी सामन्यांमध्ये भारताच्या इंग्लंड दौऱ्यादरम्यान 937 गुणांचे सर्वोच्च रेटिंग मिळवले होते. हे कोणत्याही भारतीय फलंदाजाने मिळवलेले आतापर्यंतचे सर्वोच्च आणि एकूण 11 वे सर्वोच्च रेटिंग आहे. ती मालिका त्याच्या सर्वोत्तम मालिकांपैकी एक होती, ज्यात त्याने 10 डावांमध्ये 2 शतके आणि 3 अर्धशतकांसह 593 धावा केल्या होत्या. या दौऱ्यादरम्यान भारतीय फलंदाज धावा काढण्यासाठी झगडत असताना कोहली एकट्या योद्ध्याप्रमाणे उभा होता.
कोहलीने वनडे फॉरमॅटमध्ये 2018 च्या त्याच इंग्लंड दौऱ्यादरम्यान 909 गुणांचा टप्पाही गाठला होता. त्याने 3 वनडे सामन्यांमध्ये 2 अर्धशतकांच्या मदतीने 191 धावा केल्या होत्या आणि सर्व फॉरमॅटमध्ये आपले वर्चस्व कायम ठेवले. एका वेळी कोहलीने कसोटी, वनडे आणि टी20 आंतरराष्ट्रीयमध्ये एकाच वेळी नंबर 1 रँकिंग असलेला फलंदाज असण्याचा मान मिळवला होता.
विराट कोहलीने टी20 आंतरराष्ट्रीय क्रिकेटमध्ये 125 सामन्यांमध्ये 4,188 धावा केल्या आहेत. या दरम्यान त्याची सरासरी 48.69 होती. त्याने 1 शतक आणि 25 अर्धशतके झळकावली आहेत. त्याची सर्वोच्च धावसंख्या नाबाद 122 धावा आहे. टी20 आंतरराष्ट्रीय क्रिकेटमध्ये सर्वाधिक धावा करणाऱ्या फलंदाजांमध्ये तो तिसऱ्या क्रमांकावर आहे. (T20 International Cricket Virat)
