WPL 2026 चा मेगा ऑक्शन नवी दिल्लीमध्ये उत्साहात पार पडला. पाचही संघांनी जोरदार बिडिंग करत एकूण 67 खेळाडूंना खरेदी केले असून यामध्ये 23 विदेशी खेळाडूंचाही समावेश आहे. सर्व संघांनी मिळून 40.8 कोटी रुपयांची उलाढाल केल्याने हा ऑक्शन विशेष ठरला.
भारतीय स्टार ऑलराउंडर दीप्ती शर्मा या ऑक्शनची सर्वात महागडी खेळाडू ठरल्या. त्यांनी ठेवलेल्या 50 लाखांच्या बेस प्राइजनंतर बोलीची सुरुवात दिल्ली कॅपिटल्सने केली. मात्र यूपी वॉरियर्सने ‘राइट टू मॅच’ कार्ड वापरत तब्बल 3.2 कोटी रुपये देत तिला पुन्हा आपल्या संघात सामावून घेतले.
न्यूझीलंडची फिरकीपटू आणि अष्टपैलू खेळाडू अमेलिया कर हिला देखील चांगली मागणी होती. मुंबई इंडियन्सने तिच्यावर 3 कोटी रुपयांची मोठी बोली लावत तिला पुन्हा आपल्या ताफ्यात घेतले. तिची फिरकी आणि धडाकेबाज फलंदाजीमुळे ती ऑक्शनपूर्वीपासूनच चर्चेत होती.
WPL 2026 मधील टॉप 5 महागड्या खेळाडू
| खेळाडू | टीम | किंमत |
|---|---|---|
| दीप्ती शर्मा | UP वॉरियर्स | 3.2 कोटी |
| अमेलिया कर | मुंबई इंडियन्स | 3 कोटी |
| शिखा पांडे | UP वॉरियर्स | 2.4 कोटी |
| सोफी डिवाइन | गुजरात जायंट्स | 2 कोटी |
| मेग लेनिंग | UP वॉरियर्स | 1.9 कोटी |
तिन्ही मागील हंगामात दिल्लीसाठी खेळलेल्या शिखा पांडेला या ऑक्शनमध्ये मोठा भाव मिळाला. यूपी वॉरियर्सने तिच्यासाठी तब्बल 2.4 कोटी रुपये मोजले. तिचा बेस प्राइस फक्त 40 लाख होता. सततच्या उत्कृष्ट प्रदर्शनामुळे तिच्यासाठी संघांमध्ये बिडिंग वॉर पाहायला मिळाले.
न्यूझीलंडची अनुभवी आक्रमक फलंदाज सोफी डिवाइनला गुजरात जायंट्सने 2 कोटी रुपये देत खरेदी केले. तर जगातील आघाडीच्या कर्णधारांपैकी एक असलेल्या मेग लेनिंगला यूपी वॉरियर्सने 1.9 कोटी रुपयांमध्ये संघात सामावून घेतले.
या ऑक्शननंतर पाचही संघांचे स्क्वाड मोठ्या प्रमाणात बदलले असून WPL 2026 हंगाम अधिक रोमांचक आणि स्पर्धात्मक होणार हे निश्चित मानले जात आहे.
