पंत आणि साहामध्ये यष्टीरक्षणासाठी टक्कर? वृद्धिमान साहा म्हणतो, “शेवटचा निर्णय संघ…”

भारतीय क्रिकेट संघाच्या सर्वोत्कृष्ट यष्टीरक्षकांमध्ये वृद्धिमान साहा याची गणना केली जाते. परंतु आपल्या फलंदाजीमुळे तो सतत संघातून आत-बाहेर होत असतो. ऑस्ट्रेलियाविरुद्धच्या ऍडलेड कसोटीनंतर त्याला संघातून डच्चू देण्यात आला होता अन् त्याच्याजागी रिषभ पंतला संघात सहभागी करण्यात आले होते. परंतु सिडनी कसोटीत पंतला दुखापत झाल्याने साहाने यष्टीरक्षण करत अप्रतिम कामगिरी केली होती. तरीही सतत आपली पंतशी तुलना केली जात असल्याने साहाने नाराजी व्यक्त केली आहे.

टाइम्स ऑफ इंडियाला दिलेल्या मुलाखतीत साहा म्हणाला की, “मी २०१८ पासून माझ्यात आणि पंतमध्ये तुलना केली जात असल्याचे पाहिले आहे. मी पंतच्या दमदार फलंदाजीमुळे अजिबात ताण घेत नाही. मी फक्त माझे काम करत असतो. यामुळे मी माझ्या खेळात तिळभरही बदल करणार नाही. आता संघ व्यवस्थापनालाच निर्णय घ्यावा लागेल की, यष्टीमागे कुणाला उभे करायचे?”

“यष्टीरक्षण हेच माझे काम आहे, खासकरून कसोटी क्रिकेटमध्ये आणि मी यात तज्ञ आहे असे मला वाटते. मी खात्रीने सांगू शकत नाही की, यष्टीमागे येणारा प्रत्येक झेल मी पकडू शकेल का नाही?. पण यातच माझा हातखंडा आहे. त्यामुळे मला भारतीय कसोटी संघाकडून यष्टीरक्षकाचीच भूमिका साकारायची आहे”, असे पुढे बोलताना साहाने सांगितले.

पंतला यष्टीरक्षण शैलीवर काम करण्याची गरज- साहा

पंतच्या यष्टीरक्षणाविषयी बोलताना साहा म्हणाला की, “सध्या पंत भारतीय कसोटी संघाकडून यष्टीरक्षण करत आहे. मला विश्वास आहे की, तो येत्या काळात आपल्या यष्टीरक्षण शैलीवर काम करेल. संघ व्यवस्थापनाला त्याच्यावर विश्वास आहे. पण त्यांनाही पंतच्या फलंदाजी किंवा यष्टीरक्षणामध्ये कोणत्या गोष्टीला अधिक प्राधान्य द्यायचे, याची जाणीव आहे.”

संयमाने संघात स्थान मिळण्याची वाट पाहीन- साहा