वर्ल्ड टेस्ट चॅम्पियनशिप 2025च्या अंतिम सामन्याला लॉर्ड्सवर सुरुवात झाली आहे. दक्षिण आफ्रिकेने नाणेफेक जिंकून प्रथम गोलंदाजी करताना ऑस्ट्रेलियाचा पहिला डाव फक्त 212 धावांत गुंडाळला. ज्यामध्ये कागिसो रबाडाने 5 बळी घेतले तर मार्को जॅन्सनने 3 बळी घेतले. ऑस्ट्रेलियाकडून ब्यू वेबस्टरने सर्वाधिक 72 धावांची खेळी केली तर स्टीव्ह स्मिथने 66 धावा केल्या. ऑस्ट्रेलियाची सलामी जोडी पहिल्या दिवशी अपयशी ठरली. उस्मान ख्वाजा आपले खातेही उघडू शकला नाही तर पहिल्यांदाच सलामीला आलेला मार्नूश लाबुशेन केवळ 17 धावा केल्या.
ऑस्ट्रेलियाच्या सलामी जोडीप्रमाणे, दक्षिण आफ्रिकेचे सलामीवीर देखील अपयशी ठरले. ऑस्ट्रेलियाच्या 212 धावांचा पाठलाग करण्यासाठी उतरलेली दक्षिण आफ्रिकेची सलामी जोडी अवघ्या 19 धावांतच पॅव्हेलियनमध्ये परतली. उस्मान ख्वाजाप्रमाणेच, एडेन मार्कराम देखील खाते न उघडता पॅव्हेलियनमध्ये परतला. मार्कराम ऑस्ट्रेलियाच्या वेगवान गोलंदाज स्टार्कचा बळी ठरला. अशाप्रकारे, इंग्लंडच्या भूमीवर कसोटी क्रिकेटमध्ये पहिल्यांदाच एक अनोखे दृश्य पाहायला मिळाले.
खरं तर, इंग्लंडमध्ये आतापर्यंत खेळल्या गेलेल्या 561 कसोटी सामन्यांमध्ये ही पहिलीच घटना आहे, जेव्हा दोन्ही संघांच्या फलंदाजी क्रमातील नंबर-1 फलंदाज कसोटी सामन्याच्या पहिल्या डावात शून्यावर बाद झाला आहे. उस्मान ख्वाजाने ऑस्ट्रेलियाकडून पहिल्या चेंडूचा सामना केला तर दक्षिण आफ्रिकेच्या डावाचा पहिला चेंडू एडन मार्करामने खेळला आणि दोन्ही फलंदाज आपले खाते उघडू शकले नाहीत. कसोटी क्रिकेटच्या इतिहासात हे फक्त 10 व्यांदा घडले आहे.
एडन मार्करामनंतर काही वेळातच, रायन रिकलटन देखील 9व्या षटकात मिचेल स्टार्कचा बळी ठरला. दक्षिण आफ्रिकेच्या विकेट पडण्याचा सिलसिला इथेच थांबला नाही. 16व्या षटकात वियान मुल्डरला कर्णधार पॅट कमिन्सने क्लीन बोल्ड केले तर 21 व्या षटकात ट्रिस्टन स्टब्स जोश हेझलवूडचा बळी ठरला. अशाप्रकारे दक्षिण आफ्रिकेचे 4 टॉप ऑर्डर फलंदाज अवघ्या 30 धावांच्या आत पॅव्हेलियनमध्ये परतले.
जागतिक कसोटी अजिंक्यपद स्पर्धेच्या अंतिम सामन्याचा पहिला दिवस गोलंदाजांचा होता. दोन्ही संघांच्या एकूण 14 विकेट पडल्या. दिवसाच्या खेळाच्या अखेरीस दक्षिण आफ्रिकेने 4 विकेट गमावल्यानंतर 43 धावा केल्या आहेत. दक्षिण आफ्रिका अजूनही ऑस्ट्रेलियाच्या धावसंख्येपेक्षा 169 धावांनी मागे आहे. कर्णधार टेम्बा बावुमा 3 आणि डेव्हिड बेडिंगहॅम 8 धावांवर नाबाद आहे. या दोन्ही फलंदाजांना मोठी भागीदारी करावी लागेल अन्यथा ऑस्ट्रेलिया शक्य तितक्या लवकर दक्षिण आफ्रिकेला सर्वबाद करून आघाडी मिळवेल.
