“दारू आणि सिगारेट…” ‘या’ भारतीय क्रिकेटपटूबद्दल योगराज सिंग यांची मोठी प्रतिक्रिया!

Yograj Singh Statement On Vinod Kambli: 1991 मध्ये विनोद कांबळीने आंतरराष्ट्रीय क्रिकेटमध्ये पदार्पण केले तेव्हा त्याची फलंदाजी नेहमीच चर्चेत असायची. कसोटीत 54च्या सरासरीने आणि 100 हून अधिक वनडे सामन्यांचा अनुभव असलेला कांबळी एक उत्तम फलंदाज बनण्याच्या मार्गावर होता, परंतु त्याची कारकीर्द लवकरच संपली. त्याने स्वतः दारूचे व्यसन आणि रात्री उशिरापर्यंत पार्टी करणे यासारख्या सवयी असल्याचे कबूल केले आहे. त्यावर आता युवराज सिंगचे वडील योगराज सिंग यांनी खुलासा केला आहे की त्यांनी विनोद कांबळीला त्याच्या कारकिर्दीवर लक्ष केंद्रित करण्याचा सल्ला दिला होता, परंतु त्याने तो सल्ला गांभीर्याने घेतला नाही.

इनसाइड स्पोर्टशी बोलताना योगराज सिंग म्हणाले, “मी एकदा विनोद कांबळीला सांगितले होते की, “या पार्ट्या, सिगारेट ओढणे, मुलींकडे जाणे बंद कर, नाहीतर तुझी कारकीर्द संपेल आणि तू रडत राहशील. आता पहा त्याचे काय झाले. मी त्याच्याशी बोललो, उत्तरात तो मला म्हणाला, ‘सर तुमचा वेळ संपला आहे.’ त्याला वाटायचे की तो राजा आहे. तुम्ही क्रिकेटपेक्षा मोठे होऊ शकत नाही.” (Yograj Singh talking about Vinod Kambli)

काही महिन्यांपूर्वी, विनोद कांबळी त्याच्या खराब आरोग्यामुळे चर्चेचा विषय बनला होता. 52 वर्षीय कांबळी अनेक आजारांनी ग्रस्त आहेत आणि डिसेंबर 2024 मध्ये त्यांना आकृती रुग्णालयात दाखल करण्यात आले होते. त्यांना मूत्र संसर्गाची समस्या होती, त्याचबरोबर त्यांना आर्थिक संकटाचा सामना करावा लागत आहे. माजी भारतीय क्रिकेटपटू सुनील गावस्कर यांच्या फाउंडेशनने विनोद कांबळी यांच्या उपचारांसाठी आर्थिक मदत केली होती.

विनोद कांबळीच्या आंतरराष्ट्रीय क्रिकेट कारकिर्दीवर नजर टाकल्यास, त्याने 103 वनडे सामन्यांमध्ये 2 शतकांसह 14 अर्धशतकांसह 2,477 धावा केल्या. त्याच वेळी, त्याच्या 17 सामन्यांच्या कसोटी कारकिर्दीत त्याने 1,084 धावा केल्या, ज्यामध्ये 4 शतके आणि 3 अर्धशतकांचा समावेश आहे. कांबळी अजूनही कसोटी क्रिकेटच्या इतिहासात सर्वात जलद 1,000 धावा पूर्ण करणारा भारतीय फलंदाज आहे. (Vinod Kambli’s international cricket career)