क्रिकेट खेळाचा जनक असे इंग्लंडला म्हटले जाते. सर्वप्रथम इंग्लंडमध्ये हा खेळ खेळला गेला आणि ते राज्य करत असलेल्या प्रत्येक देशात हा खेळ घेऊन गेले. ऑस्ट्रेलिया, भारत, कॅरेबियन बेटे या देशांमध्ये क्रिकेटने अफाट लोकप्रियता मिळवली.
१९७५ पासून एकदिवसीय क्रिकेट विश्वचषक सुरू झाला. पहिले दोन वेळेस वेस्टइंडीजने विश्वचषकावर नाव कोरले .त्यानंतर अनुक्रमे भारत, ऑस्ट्रेलिया, पाकिस्तान इतकेच काय तर, अगदी पंचवीस-तीस वर्षापूर्वी क्रिकेट खेळायला सुरुवात केलेल्या श्रीलंकेने देखील १९९६ मध्ये विश्वचषक जिंकला. त्यानंतर ऑस्ट्रेलियाने सलग तीन वेळेस विश्वचषक जिंकून क्रिकेटवर दबदबा कायम राखला.
क्रिकेटचे नवे प्रारूप म्हणजे टी२० क्रिकेट २००६ मध्ये सुरू झाले. २००७ मध्ये भारताने व २००९ मध्ये पाकिस्तानने या टी२० क्रिकेटचे पहिले दोन विश्वचषक जिंकले. इतके सगळे होऊन, ज्यांनी क्रिकेटचा शोध लावला त्या इंग्लंडच्या नावे अजून एकही आयसीसी चषक नव्हता.
२०१० साली वेस्टइंडीजमध्ये म्हणजेच कॅरेबियन बेटांवर झालेल्या, तिसऱ्या टी२० विश्वचषकाचे विजेतेपद मिळवून, इंग्लंडने आपला आयसीसी स्पर्धेतील विजयाचा दुष्काळ संपविला. या जेतेपदाच्या मागे एका द. आफ्रिकेत जन्मलेल्या परंतु इंग्लंडसाठी खेळत असलेल्या खेळाडूचा हात होता आणि तो खेळाडू म्हणजे यष्टीरक्षक फलंदाज क्रेग किस्वेटर.
२८ नोव्हेंबर १९८७ रोजी त्याचा आफ्रिकेतील जोहान्सबर्ग येथे जन्म झाला. शाळेत असताना त्याला गोल्फ व क्रिकेटविषयी आवड निर्माण झाली आणि त्याने शालेय स्तरावर क्रिकेट खेळायला सुरुवात केली.
किस्वेटरने वयाच्या १८ व्या वर्षापर्यंत द. आफ्रिकेसाठी क्रिकेट खेळले. २००६ च्या १९ वर्षाखालील विश्वचषकात त्याने द.आफ्रिकेचे प्रतिनिधित्वदेखील केले. त्यानंतर संधी न मिळाल्याने त्याने इंग्लंडमध्ये क्रिकेट खेळायचा पर्यायी मार्ग शोधला. तो मिलफिल्ड येथे शिकत असताना, त्याला सॉमरसेटच्या व्यवस्थापनाने पाहिले. काउंटी क्रिकेटमध्ये यष्टीरक्षक फलंदाजांच्या अभावामुळे किस्वेटरला सॉमरसेटने संधी दिली. २००७ च्या मोसमात त्याने संघासाठी पदार्पण केले. आपल्या स्कॉटिश आईच्या नागरिकत्वाच्या माध्यमातून तो काउंटी क्रिकेट खेळण्यास पात्र ठरला. त्याच्या दमदार कामगिरीमुळे लवकरच इंग्लंडकडून खेळण्याच्या त्याच्या संभाव्यतेविषयी चर्चा सुरू झाली. याच वेळी, दक्षिण आफ्रिकेचा कर्णधार ग्रॅमी स्मिथने त्याला दक्षिण आफ्रिकेत येऊन राष्ट्रीय संघासाठी खेळण्याचे आमंत्रण दिले. पण, किस्वेटरने इंग्लंडसाठी खेळण्यास प्राधान्य दिले.
२००९ मध्ये इंग्लंडचा दिग्गज फलंदाज मार्क ट्रेस्काॅथिक समवेत ३०२ धावांची विक्रमी भागीदारी त्याने रचली. त्याच मोसमात त्याने १०० हून अधिक धावा फटकावल्या. २०१० च्या सुरुवातीस, किस्वेटरने त्याचे लक्ष्य गाठले. इंग्लंड लायन्ससाठीच्या (इंग्लंड अ ) मजबूत कामगिरीमुळे, त्याला बांगलादेश विरुद्धच्या मालिकेसाठी इंग्लंडच्या राष्ट्रिय संघात स्थान मिळाले. इंग्लंड संघात दक्षिण आफ्रिकेमध्ये जन्मलेल्या या खेळाडूच्या निवडीवर टीकाही झाली, काहींनी असे सुचवले की, या इंग्लंडच्या संघात परदेशात जन्मलेले खेळाडू कमी असले पाहिजेत. किस्वेटरने आपल्या तिसर्या सामन्यातच शतक झळकावत टीकाकारांची तोंडे बंद केली.
२०१० च्या आयसीसी टी२० विश्वचषकासाठी जेव्हा इंग्लंडच्या संघाची घोषणा केली गेली तेव्हा किस्वेटरला संघात एकमेव विकेटकीपर म्हणून स्थान देण्यात आले. किस्वेटरने संपूर्ण स्पर्धेदरम्यान मायकल लंबसह डावाची सुरुवात केली. अँड्र्यू मॅकग्लॅशनने इंग्लंड संघाने अंतिम फेरी गाठण्यामागे किस्वेटरचा सिंहाचा वाटा आहे, अशी त्याची स्तुति केली होती. अंतिम सामन्यात किस्वेटर इंग्लंडचा सर्वाधिक धावा करणारा फलंदाज होता, त्याने ४९ चेंडूत ६३ धावा फटकावल्या. इंग्लंडने आयसीसी स्पर्धेचे पहिले विजेतेपद मिळवले. अंतिम सामन्याचा मानकरी किस्वेटर ठरला. स्पर्धेदरम्यान, किस्वेटरने ३१.७१ च्या सरासरीने व ११६.५ च्या स्ट्राईक रेटने २२२ धावा काढल्या. स्पर्धेतील सर्वाधिक धावा काढणाऱ्या खेळाडूंमध्ये तो चौथ्या स्थानी राहिला.
विश्वचषकानंतर तो काही काळ फॉर्मशी झगडत होता. पुढील ८ वनडे सामन्यात त्याला फक्त १२१ धावा काढता आल्या. पण लवकरच त्याने स्थानिक स्पर्धेतील अप्रतिम कामगिरीच्या जोरावर पुन्हा संघात स्थान मिळवले. यावेळी मात्र त्याला, त्याचा सॉमरसेटचा सहकारी यष्टीरक्षक फलंदाज जोस बटलर राष्ट्रीय संघातील जागेसाठी आव्हान देत होता.
बटलर व किस्वेटर यांना आलटून-पालटून संधी दिली जात होती. किस्वेटरच्या कामगिरीत सातत्य नव्हते तर दुसरीकडे बटलरने किस्वेटरपेक्षा अधिक आक्रमक होत मर्यादित षटकांच्या क्रिकेटमध्ये धावांचा रतीब घालायला सुरुवात केली. या दोघांच्या सोबतच यॉर्कशायरचा जॉनी बेअरस्टो हा देखील त्यांच्याच प्रतिभेचा खेळाडू पुढे येत होता.
२०१२ मध्ये अखेरचा टी२० सामना खेळल्यानंतर तो वनडे संघात कायम होता परंतु टी२० संघाचे दरवाजे त्याच्यासाठी बंद झाले होते. २०१३ मध्ये वनडे संघातून देखील त्याला डच्चू देण्यात आला. किस्वेटर पुन्हा एकदा घरगुती सामन्यात चांगली कामगिरी करत होता. या कामगिरीचे फळ म्हणून त्याला २०१४ च्या टी२० विश्वचषकात ल्यूक राइटचा बदली खेळाडू म्हणून बांगलादेशमध्ये बोलावून घेण्यात आले. परंतु, त्याला खेळण्याची संधी मिळाली नाही.
१२ जुलै २०१४ रोजी काउंटी चॅम्पियनशिप सामन्यात नॉर्थॅम्प्टनशायरविरूद्ध फलंदाजी करताना डेव्हिड विली या वेगवान गोलंदाजाचा चेंडू किस्वेटरच्या हेल्मेटवरील लोखंडी जाळी व वायजरमधून जाऊन नाकावर व डोळ्याच्या खाली लागला.
त्याच्या चेहऱ्यावर शस्त्रक्रिया झाली.पण, काही काळानंतर दृष्टीदोषचा त्रास सुरु झाला. २०१४ च्या हंगामाच्या समाप्तीपूर्वी तो सॉमरसेटच्या संघात परतला आणि मिडलसेक्सविरुद्धच्या पहिल्या सामन्यात त्याने अर्धशतक झळकावले, तरीही त्याने कबूल केले की त्याची दृष्टी अद्याप पूर्ववत झाली नाही.
१० डिसेंबर २०१४ रोजी इंग्लंडच्या २०१५ क्रिकेट विश्वचषकासाठीच्या ३० सदस्यीय संभावित संघात त्याचा समावेश करण्यात आला. किस्वेटरने स्पष्ट केले की अद्यापही त्याला दृष्टी समस्या आहेत. त्याने जाहीर केले की २०१५ च्या हंगामात तो खेळणार नाही आणि पुढील उपचार घेईल. त्यानंतरच्या जूनमध्ये, त्याने व्यावसायिक क्रिकेटमधून निवृत्तीची घोषणा केली. त्याने निवृत्ती वेळी सांगितले,
” माझी उजव्या डोळ्याची क्षमता आधीसारखी राहिली नाही. शारीरिक दृष्ट्या अजूनही मी खेळण्यास सक्षम आहे. परंतु, देशासाठी हव्या असलेल्या दर्जावर मी खेळू शकत नाही. माझ्यामुळे कोणत्याही दर्जेदार खेळाडूची जागा अडून राहू नये. ”
किस्वेटरने क्रिकेटमधून निवृत्ती घेतल्यानंतर, त्याच्या वडिलांनी त्याला गोल्फ खेळावा अशी सूचना केली. दक्षिण आफ्रिकेत शालेय स्तरावर प्रांतीय स्पर्धांमध्ये तो गोल्फ खेळला होता. डेव्हिड लीडबॅटरच्या मार्गदर्शननंतर, तो व्यावसायिक गोल्फर बनला.
इंग्लंडचा पुढचा पीटरसन अशी ख्याती बनलेला आणि जोस बटलर व जॉनी बेअरस्टो यांच्या आधी तडाखेबंद सलामीवीर म्हणून प्रसिद्ध झालेल्या किस्वेटरला, कामगिरीतील सातत्याच्या अभावी तसेच, दुर्दैवी दुखापतीमुळे वयाच्या अवघ्या २७ व्या वर्षी निवृत्ती घ्यावी लागली.