यावर्षी ऑस्ट्रेलियामध्ये आयसीसी टी-२० विश्वचषक (T20 World Cup 2022) खेळला जाणार आहे. याच पार्श्वभूमीवर भारताचे माजी सलामीवीर फलंदाज आकाश चोप्रा (Aakash chopra) यांनी विश्वचषकासाठी निवडल्या जाणाऱ्या संभावित भारतीय संघातील नावे सांगितले आहेत. त्यांच्या मते युवा वेगवान गोलंदाज हर्षल पटेल (Harshal Patel) ऑस्ट्रेलियात अपेक्षित कामगिरी करू शकणार नाही. हर्षल आगामी विश्वचषक स्पर्धेत जसप्रीत बुमराह आणि भुवनेश्वर कुमारसोबत भारताच्या गोलंदाजी आक्रमणाचा भाग असेल असी शक्यता होती. मात्र, आकाश चोप्रांचे याबाबतीत मत वेगळे आहे.
त्यांच्या यूट्यूब चॅनलवर बोलताना आकाश चोप्रा म्हणाले की, “मी हर्षल पटेलचे नाव घेणार नाही. कारण मला वाटते ऑस्ट्रेलियात त्याची गोलंदाजी कामी येणार नाही. मी हर्षलच्या विरोधात नाहीय, पण ऑस्ट्रेलियातील खेळपट्ट्या वेगळ्या आहेत. त्याठिकाणी चेंडू खेळपट्टीवर पकड बनवत नाही. मी त्याल बुमराहसोबत शेवटच्या षटकांमध्ये गोलंदाजी करताना पाहत नाहीये.” दरम्यान, हर्षल पटेलने नुकतेच भारतीय संघासाठी पदार्पण केले आहे. आतापर्यंत खेळलेल्या ८ टी२० सामन्यांमध्ये त्याने ११ विकेट्स घेतल्या आहेत, तरीही आकाश चोप्रांनी असे मत व्यक्त केले आहे.
आकाश चोप्रांच्या मते जसप्रीत बुमराहची जागा पक्की आहे. ते म्हणाले, “भुवनेश्वर कुमार आणि दीपक चाहरमध्ये चांगली टक्कर आहे. दीपक चाहर थोडा पुढे दिसत आहे. कारण तो फलंदाजीही करू शकतो. भुवनेश्वर कुमारही चांगली गोलंदाजी करत आहे. विश्वचषकासाठी अजून ८ महिने वेळ आहे.” त्यांच्यामते ऑस्ट्रेलियात वेगवान गोलंदाजांची भूमिका खूप महत्वाची आहे. त्यामुळे संघात विविधता असणे गरजेचे आहे.
चोप्रांच्या मते ऑस्ट्रेलियामध्ये भारताला एक डावखुऱ्या गोलंदाजीच आवश्यकता आहे. ते म्हणाले, “मोहम्मद शमीव्यतिरिक्त टी नटराजनर आणि खलील अहमदही असेल. एका डावखुऱ्या गोलंदाजाची गरज असेल. एक डावखुरा गोलंदाज एक्स फॅक्टर घेऊन येईल. मोहम्मद शमीला ऑस्ट्रेलियामध्ये नेले पाहिजे.”
त्यांच्या मते शार्दुल ठाकुरला विश्वचषक स्पर्धेत संधी मिळणे कठीण आहे. कारण, दीपक चहर त्याच्यासारखाच गोलंदाज आहे. शार्दुल पाहिल्या ६ षटकांमध्ये गोलंदाजी करत नाही आणि शेवटच्या षटकांमध्ये गोलंदाजीसाठी येत नाही. दीपक चहर पहिल्या षटकांमध्ये गोलंदाजी करू शकतो. फिरकी गोलंदाजांमध्ये युजवेंद्र चहलला संधी मिळण्याची जास्त शक्यता आहे.