मुंबई । एकाच चढाईत श्रीकांत मोरेने टिपलेले 3 बळी आणि त्यानंतर सामन्यात साधलेली 25-25 अशा बरोबरीनंतरही श्री गणेश व्यायामशाळेला मातृभूमी क्रीडा मंडळाकडून 29-37 अशी हार खावी लागली. तर जयभारतने अत्यंत चुरशीच्या सामन्यात अमर क्रीडा मंडळावर 35-30 मात करीत आपली आगेकूच कायम राखली.
अन्य सामन्यात दिलखूश मित्र मंडळ आणि भवानीमाता क्रीडा मंडळाने प्रतिस्पर्धी संघावर सहज विजयासह उपांत्यपूर्व फेरीत स्थान मिळवले.
वरळी विभागातील क्रिकेटपटूंचे लाडके स्थान असलेल्या वरळी स्पोर्टस् क्लबच्या मैदानात सुरू असलेल्या द्वितीय श्रेणी कबड्डी स्पर्धेच्या दुसऱया दिवशीही कबड्डीप्रेमींचा उत्साह वरळीकरांना पाहायला मिळाला.
श्री गणेश व्यायामशाळा आणि मातृभूमी यांच्यात झालेला सामना जबरदस्त रंगला. गौरव गावडेने एकाच चढाईत टिपलेल्या तीन गुणांमुळे मातृभूमीने पहिल्या डावात आघाडी घेण्याचा प्रयत्न केला, पण श्रीकांत मोरे आणि प्रफुल्ल पवारच्या आक्रमक खेळाने श्री गणेश संघाला मातृभूमीच्या जवळपास ठेवले.
खेळ थांबला तेव्हा दोन्ही संघाचा गुणफलक 16-16 असा बरोबरीत होता. मध्यंतरानंतरही दोन्ही संघांमध्ये आघाडी घेण्यासाठी तीव्र संघर्ष सुरू होता. तेव्हाच गौरव गावडेच्या सुसाट चढायांनी सामन्याचा रंगच बदलला.
झटपट एकामागोमाग दोन लोण चढवून मातृभूमीने आघाडी घेतली. दुसरीकडे श्रीकांत मोरेने जोरदार चढाया करून संघाला सामन्यात ठेवण्याचा प्रयत्न ठेवला, पण शेवटच्या तीन-चार मिनीटांत मातृभूमीच्या गुणांना श्री गणेशचे खेळाडू रोखण्यात अपयशी ठरले आणि सामन्यावर मातृभूमीने आपले शिक्कामोर्तब केले.
जयभारत सेवा मंडळ आणि अमर क्रीडा मंडळ यांच्यातील लढतही रंगतदार झाली. आकाश चव्हाण आणि मनीष दळवीने जयभारतला 17-14 अशी आघाडी मिळवून देताना वेगवान खेळ केला.
अमरकडून स्वप्नील साळवी आणि तुषार तळेकरने चढाया-पकडींचा दमदार खेळ करीत सामन्यात रंगत राखली. मध्यंतरानंतर दोन्ही संघांनी एकमेकांना तोडीस तोड उत्तर दिल्यामुळे गुणफलक 28-27 असा होता, पण इथेही शेवटची चार मिनीटे जयभारतला विजय मिळवून देण्यात यशस्वी ठरली.
तिसऱया सामन्यात सुशांत धाडवेच्या भन्नाट खेळामुळे भवानीमाता क्रीडा मंडळाने हिंदकेसरीचा 36-14 असा धुव्वा उडवला तर दिलखूशने प्रभादेवीच्या जयदत्तची 42-12 अशी धुळधाण उडवली.
या एकतर्फी सामन्यात दिलखूशने पूर्वाधात दोन आणि उत्तरार्धात दोन असे चार लोण चढवून जयदत्तच्या खेळाडूंना मैदानात उभेच राहू दिले नाही.
दुसऱया दिवसाच्या सामन्यांचे निकाल
श्री गणेश व्यायामशाळा ( 16 आणि 13) पराभूत वि. मातृभूमी क्रीडा मंडळ ( 16 आणि 21)
जयभारत सेवा मंडळ (17 आणि 18) विजयी वि. अमर क्रीडा मंडळ (14 आणि 16)
हिंदकेसरी क्रीडा मंडळ (10 आणि 4) पराभूत वि. भवानीमाता क्रीडा मंडळ ( 16 आणि 20)
दिलखूश मित्र मंडळ (24 आणि 18) विजयी वि. जयदत्त क्रीडा मंडळ ( 4 आणि 8)
संबंधित वृत्त-
–अजित पवार कबड्डीसाठी देणार या क्रीडा संघटनेच्या अध्यक्षपदाचा राजीनामा?
– पुणे जिल्हा कबड्डी असोशिएशनमधून राज्य संघटनेवर कोण तिघे जाणार?
–महाराष्ट्र राज्य कबड्डी संघटनेची पंचवार्षिक निवडणूक २७ मे रोजी
–वरळी स्पोर्टस् क्लब कबड्डीमध्ये जय ब्राह्मणदेवची जोरदार सलामी
–संपुर्ण यादी- प्रो कबड्डी लिलावासाठी महाराष्ट्राचे हे ४२ खेळाडू आहेत उपलब्ध