आशिया कप 2025च्या शेवटच्या साखळी फेरीच्या सामन्यात भारताने ओमानचा 21 धावांनी पराभव केला. प्रथम फलंदाजी करताना भारताने 188 धावा केल्या आणि ओमानसमोर 189 धावांचे लक्ष्य ठेवले. प्रत्युत्तरात ओमानच्या फलंदाजांनी शानदार कामगिरी केली. त्यांनी शेवटच्या षटकापर्यंत फलंदाजी केली पण ते 4 गडी गमावून फक्त 167 धावाच करू शकले. ओमानकडून आमिर कलीम आणि हम्माद मिर्झा यांनी अर्धशतके झळकावली. या स्पर्धेत टीम इंडियाचा हा सलग तिसरा विजय आहे. भारताने आतापर्यंत या आशिया कपमध्ये एकही सामना गमावलेला नाही.
ओमानविरुद्धच्या सामन्यात टीम इंडियाचा कर्णधार सूर्यकुमार यादवने नाणेफेक जिंकून प्रथम फलंदाजी करण्याचा निर्णय घेतला. भारताकडून अभिषेक शर्मा आणि शुबमन गिलने डावाची सुरुवात केली, परंतु गिल 8 चेंडूत फक्त 5 धावा करून बाद झाला. त्यानंतर संजू सॅमसन आणि अभिषेक यांनी दुसऱ्या विकेटसाठी 66 धावांची भागीदारी केली. या सामन्यातही अभिषेकने शानदार फलंदाजी केली, त्याने 15 चेंडूत 38 धावा केल्या. अक्षर पटेल (26) आणि तिलक वर्मा (29) दोघांनीही चांगली सुरुवात केली पण त्यांना मोठ्या धावसंख्येत रूपांतरित करण्यात अपयश आले. या सामन्यात संजू सॅमसन भारताचा सर्वाधिक धावा करणारा फलंदाज होता, त्याने 45 चेंडूत 3 चौकार आणि 3 षटकारांसह 56 धावा केल्या. ओमानच्या गोलंदाजीबद्दल बोलायचे झाले तर, शाह फैसल, जितेन रामानंदी आणि आमिर कलीम यांनी प्रत्येकी दोन बळी घेतले.
🚨 3 WINS IN 3 MATCHES FOR INDIA IN ASIA CUP 2025 🚨
— Johns. (@CricCrazyJohns) September 19, 2025
– Surya Army is Ruling in UAE. pic.twitter.com/w9Y80RMhZp
189 धावांच्या लक्ष्याचा पाठलाग करताना ओमानला चांगली सुरुवात मिळाली. जतिंदर सिंग आणि आमिर कलीम यांनी पहिल्या विकेटसाठी 56 धावांची भागीदारी केली. 33 चेंडूत 32 धावा काढल्यानंतर कुलदीप यादवने जतिंदर सिंगला बाद केले. त्यानंतर तिसऱ्या क्रमांकावर फलंदाजीसाठी हम्माद मिर्झा आला आणि आमिर कलीमला चांगली साथ दिली. दोघांनी दुसऱ्या विकेटसाठी 93 धावांची भागीदारी केली. भारताला दुसरे यश 18व्या षटकात मिळाले, जेव्हा हर्षितने आमिर कलीमला बाद केले. त्याने 46 चेंडूत 7 चौकार आणि 2 षटकारांसह 64 धावा केल्या. हम्माद मिर्झा 33 चेंडूत 51 धावा करून बाद झाला. भारताकडून हर्षित, अर्शदीप, कुलदीप आणि हार्दिक यांनी प्रत्येकी एक बळी घेतला.
