ऑस्ट्रेलियाने बांगलादेशविरुद्ध पुढील महिन्यात होणाऱ्या दोन सामन्यांच्या कसोटी मालिकेसाठी 13 सदस्यांचा संघ जाहीर केला आहे. ऑस्ट्रेलियन कर्णधार पॅट कमिन्सचे संघात पुनरागमन झाले असून, तो या वर्षातील आपला पहिला सामना खेळण्यास सज्ज आहे.
कमिन्सने गेल्या वर्षी डिसेंबरमध्ये आपला शेवटचा सामना खेळला होता. त्यानंतर तो संघाबाहेर होता. आता 13 ऑगस्टपासून सुरू होणाऱ्या बांगलादेशविरुद्धच्या कसोटी मालिकेत तो मैदानात उतरणार आहे. कमिन्ससोबतच वेगवान गोलंदाज मिचेल स्टार्क आणि जोश हेझलवूड यांचाही संघात समावेश करण्यात आला आहे. परिणामी, बांगलादेशी फलंदाजांना या अनुभवी वेगवान गोलंदाजी आक्रमणाचा तगडा सामना करावा लागेल.
इंग्लंडविरुद्धच्या ॲशेस मालिकेदरम्यान हॅमस्ट्रिंगच्या दुखापतीमुळे संघाबाहेर राहिलेला अनुभवी फिरकीपटू नॅथन लायनचेही संघात पुनरागमन झाले आहे. याव्यतिरिक्त, राखीव वेगवान गोलंदाज स्कॉट बोलँड तसेच अष्टपैलू खेळाडू ब्यू वेबस्टर आणि कॅमेरॉन ग्रीन यांनीही संघात स्थान मिळवले आहे.
सध्या वर्ल्ड टेस्ट चॅम्पियनशिप (WTC) गुणतालिकेत अव्वल स्थानी असलेला ऑस्ट्रेलिया संघ फलंदाजीची जबाबदारी ट्रॅव्हिस हेड, जोश इंग्लिस, स्टीव्ह स्मिथ, मार्नस लबुशेन आणि जेक वेदरल्ड यांच्यावर सोपवेल.
दरम्यान, मायकल नेसर, टॉड मर्फी आणि ब्रेंडन डॉगेट यांचा संघात समावेश करण्यात आलेला नाही.
या दरम्यान, निवड समितीचे अध्यक्ष जॉर्ज बेली म्हणाले “राष्ट्रीय निवड समिती पॅट कमिन्स, जोश हेझलवूड आणि नॅथन लायन यांच्या पुनरागमनाची आतुरतेने वाट पाहत होती. गेल्या काही महिन्यांत, दुखापतीतून सावरण्यासाठी त्यांनी वैयक्तिक पातळीवर तसेच क्रीडा विज्ञान आणि क्रीडा वैद्यकीय पथकांच्या मदतीने अत्यंत कठोर परिश्रम घेतले आहेत.”
ते पुढे म्हणाले, “हा १३ सदस्यांचा संघ असला तरी, मालिकेपूर्वी काही बदल करण्याची आवश्यकता भासल्यास आमच्याकडे पर्यायी खेळाडू सज्ज आहेत. पुढील 12 महिन्यांतील क्रिकेटचे व्यस्त वेळापत्रक पाहता, अनेक खेळाडूंना विविध फॉरमॅटमध्ये संधी मिळण्याची शक्यता आहे.”
ऑस्ट्रेलिया सध्या वर्ल्ड टेस्ट चॅम्पियनशिप गुणतालिकेत अव्वल स्थानावर आहे, तर बांगलादेश चौथ्या स्थानावर आहे. या दोन संघांमधील पहिली कसोटी डार्विन येथे 13 ते 17 ऑगस्ट दरम्यान, तर दुसरी कसोटी मॅके येथे 22 ते 26 ऑगस्ट दरम्यान खेळवली जाणार आहे.
बांगलादेशविरुद्धच्या मालिकेसाठी ऑस्ट्रेलियाचा कसोटी संघ
पॅट कमिन्स (कर्णधार), स्कॉट बोलँड, ॲलेक्स कॅरी, कॅमेरॉन ग्रीन, जोश हेझलवूड, ट्रॅव्हिस हेड, जोश इंग्लिस, मार्नस लॅबुशेन, नॅथन लायन, स्टीव्ह स्मिथ, मिचेल स्टार्क, जेक वेदरल्ड आणि बो वेबस्टर.
