आयुष बदोनीची भारतीय संघात निवड झाली आहे. वास्तविक, वडोदरा येथे न्यूझीलंडविरुद्ध झालेल्या पहिल्या एकदिवसीय सामन्यात वॉशिंग्टन सुंदरला दुखापत झाली होती. यामुळे तो न्यूझीलंडविरुद्धच्या एकदिवसीय मालिकेतून बाहेर पडला आहे. त्याच्या जागी बीसीसीआयने (BCCI) आयुष बदोनीचा एकदिवसीय संघात समावेश केला आहे. आयुष बदोनी हे आयपीएलमधील एक ओळखीचे नाव असून त्याने 2022 मध्ये लखनऊ सुपर जायंट्ससाठी पदार्पण केले होते. तेव्हापासून तो दरवर्षी संघासाठी उत्कृष्ट कामगिरी करत आहे.
आयुष बदोनीला आयपीएल खेळण्यासाठी लखनऊ सुपर जायंट्स 4 कोटी रुपये देते. खरं तर, आयपीएल 2025 च्या मेगा ऑक्शनपूर्वी LSG ने आयुषला 4 कोटी रुपयांमध्ये रिटेन केले होते. आता आयपीएल 2026 खेळण्यासाठी देखील त्याला 4 कोटी रुपये मिळतील. यापूर्वी 2022, 2023 आणि 2024 मध्ये त्याला प्रत्येकी 20-20 लाख रुपये मिळाले होते.
आयुष बदोनीने इंडियन प्रीमियर लीगमध्ये आपला पहिला सामना 2022 मध्ये खेळला होता. पहिल्याच वर्षी तो संघासाठी एक उत्तम फिनिशर म्हणून समोर आला. त्यानंतर त्याच्या कामगिरीत सातत्याने सुधारणा झाली आहे. आयपीएलमध्ये आतापर्यंत त्याने 56 सामन्यांत 963 धावा केल्या आहेत. त्याने 26.75 च्या सरासरीने फलंदाजी केली असून त्याचा स्ट्राईक रेट 138.56 आहे. तो 10 वेळा नाबाद राहिला असून आयपीएलमध्ये त्याने आतापर्यंत 6 अर्धशतके झळकावली आहेत.
वॉशिंग्टन सुंदर बाहेर पडल्यानंतर आता आयुष बदोनीचे नशीब चमकू शकते. भारतीय संघ तीन फिरकी गोलंदाजी पर्यायांसह मैदानात उतरू इच्छित आहे. याच कारणामुळे नितीश कुमार रेड्डी यांच्या ऐवजी वॉशिंग्टन सुंदर पहिला एकदिवसीय सामना खेळला होता. जर भारत त्याच योजनेनुसार पुढे गेला, तर रेड्डी यांच्या ऐवजी आयुष बदोनीला संधी मिळू शकते. तो खालच्या फळीत फलंदाजी करण्यासोबतच ऑफ-स्पिन गोलंदाजीचा पर्यायही देतो. अशा परिस्थितीत, त्याला थेट ‘प्लेइंग 11’ मध्ये स्थान मिळू शकते.
