विराट कोहली मंगळवारी होणाऱ्या विजय हजारे ट्रॉफी 2025-26 मधील दिल्ली विरुद्ध रेल्वे सामन्यात खेळणार नाही. दिल्लीचे प्रशिक्षक सरनदीप सिंह यांनी या वृत्ताला दुजोरा दिला आहे. यापूर्वी कोहली स्पर्धेतील सुरुवातीच्या 2 सामन्यांमध्ये दिल्लीसाठी खेळला होता. न्यूझीलंडविरुद्धच्या वनडे मालिकेसाठी भारतीय संघात सामील होण्यापूर्वी कोहली रेल्वेविरुद्धचा सामना खेळू शकतो, अशी आशा व्यक्त केली जात होती.
बीसीसीआयच्या मार्गदर्शक तत्त्वांचे पालन करत विराट कोहलीने विजय हजारे ट्रॉफीच्या चालू हंगामात सुरुवातीचे 2 सामने खेळले होते. त्याने आंध्र प्रदेशविरुद्धच्या पहिल्या सामन्यात 131 धावांची शानदार खेळी केली होती, तर गुजरातविरुद्ध 77 धावांचे अर्धशतक झळकावले होते. या दोन्ही सामन्यांत दिल्लीने विजय मिळवला होता. त्यानंतर झालेल्या 3 सामन्यांत कोहली खेळला नाही, ज्यापैकी दिल्लीने 2 सामने जिंकले आणि 1 सामना गमावला.
दिल्लीचे प्रशिक्षक सरनदीप सिंह यांनी स्पष्ट केले की कोहली रेल्वेविरुद्ध खेळणार नाही. ते म्हणाले, “नाही, तो उपलब्ध नाही.” भारत विरुद्ध न्यूझीलंड यांच्यातील 3 सामन्यांची वनडे मालिका 11 जानेवारीपासून सुरू होत आहे. या मालिकेसाठी भारतीय संघात सामील होण्यापूर्वी तो 6 जानेवारीला विजय हजारे ट्रॉफीमध्ये आणखी एक सामना खेळेल, अशी शक्यता वर्तवण्यात आली होती.
कोहली न्यूझीलंडविरुद्धच्या वनडे मालिकेच्या तयारीसाठी जास्तीत जास्त वेळ देऊ इच्छित आहे, त्यामुळे तो मंगळवारी खेळणार नाही. दिल्लीचा संघ सध्या ग्रुप डी मध्ये असून, 5 पैकी 4 सामने जिंकून संघ आपल्या ग्रुपच्या गुणतालिकेत अव्वल स्थानावर आहे.
बीसीसीआयच्या नियमानुसार, सेंट्रल कॉन्ट्रॅक्ट असलेल्या खेळाडूंना विजय हजारे ट्रॉफीचे किमान 2 सामने खेळणे बंधनकारक होते. आंध्र आणि गुजरातविरुद्ध खेळून कोहलीने ही अट पूर्ण केली आहे. ‘टाइम्स ऑफ इंडिया’च्या वृत्तानुसार, डीडीसीएचे अध्यक्ष रोहन जेटली यांनी गेल्या आठवड्यात सांगितले होते की कोहली रेल्वेविरुद्धचा सामना देखील खेळणार आहे.
