आशियाई क्रिकेट परिषद (ACC) ची आशिया कपवर चर्चा करण्यासाठी 24 जुलै रोजी बांगलादेशातील ढाका येथे बैठक होणार आहे, परंतु आता ही बैठक अडचणीत आली आहे. भारतीय क्रिकेट नियामक मंडळ (BCCI) सह इतर अनेक ACC सदस्य मंडळांनी राजकीय आणि राजनैतिक चिंतांमुळे बैठकीवर बहिष्कार टाकण्याचा निर्णय घेतला आहे. बीसीसीआयने ACC आणि पाकिस्तान क्रिकेट बोर्ड (PCB) चे अध्यक्ष मोहसिन नक्वी यांना अधिकृतपणे कळवले आहे की जर ही बैठक ढाका येथे झाली तर ते त्यात सहभागी होणार नाहीत. भारत आणि बांगलादेशमधील सध्याच्या तणावपूर्ण राजकीय संबंधांच्या पार्श्वभूमीवर हा निर्णय घेण्यात आला आहे. वाढत्या विरोधाला न जुमानता, ACC चे अध्यक्ष मोहसिन नक्वी ढाका येथे बैठक घेण्यावर ठाम आहेत.
भारताव्यतिरिक्त, श्रीलंका, ओमान आणि अफगाणिस्तानच्या क्रिकेट मंडळांनीही बहिष्कारात सामील झाल्याचे आणि स्थळावर समान आक्षेप घेतल्याचे वृत्त आहे.
एएनआयच्या सूत्रांच्या माहितीनुसार , “आशिया कप तेव्हाच होऊ शकतो जेव्हा बैठकीचे ठिकाण ढाकाहून बदलले जाईल. एसीसीचे अध्यक्ष मोहसिन नक्वी बैठकीसाठी भारतावर अनावश्यक दबाव आणण्याचा प्रयत्न करत आहेत. आम्ही त्यांना ठिकाण बदलण्याची विनंती केली होती परंतु त्यांना कोणताही प्रतिसाद मिळाला नाही. जर मोहसिन नक्वी ढाकामध्ये बैठक घेत असतील तर बीसीसीआय कोणत्याही प्रस्तावावर बहिष्कार टाकेल.”
एसीसीच्या नियमांनुसार, ढाकामध्ये होणाऱ्या बैठकीत जर सर्व मोठ्या सदस्य देशांचा सहभाग नसेल, तर घेतलेले निर्णय बेकायदेशीर मानले जाऊ शकतात. त्यामुळे वाद निर्माण होऊ शकतो, विशेषतः आशिया कप सप्टेंबरमध्ये होणार होता, पण तो आता पुढे ढकलण्यात आला आहे.
सूत्रांनी पुढे सांगितले की, ढाकामध्ये बैठक घेण्याचा नक्वी यांचा आग्रह आशिया कपच्या बाबींवर भारतावर अनावश्यक दबाव आणण्याचा प्रयत्न म्हणून पाहिला जात आहे. नियोजित बैठकीसाठी फक्त पाच दिवस शिल्लक असताना, एसीसीने स्थळातील कोणत्याही बदलाबद्दल कोणतीही अधिकृत माहिती दिलेली नाही, ज्यामुळे आशिया कपचे भविष्य अनिश्चित झाले आहे.
