‘या’ खेळाडूचे पुनरागमन झाल्याने कुलदीप यादवचा पत्ता कट, डे-नाइट कसोटीसाठी टीम इंडियात मोठा बदल

भारत आणि श्रीलंका यांच्यातील पहिला कसोटी सामना मोहालीमध्ये खेळला गेला. पहिल्या सामन्यात भारताने एक डाव आणि २२२ धावांनी मोठा विजय मिळवला. या विजयानंतर उभय संघातील दुसरा आणि अखेरचा कसोटी सामना १२ मार्चपासून बेंगलोरमध्ये खेळला जाणार आहे. तत्पूर्वी भारतीय संघात एक मोठा बदल घडला आहे. भारताच्या कसोटी संघात अष्टपैलू अक्षर पटेलचे पुनरागमन झाले आहे.

अक्षर पटेल (axar patel) मागच्या काही काळापासून दुखापतीमुळे संघातून बाहेर होता. आता तो दुखापतीतून सावरला आहे आणि संघात पुनरागमन केले आहे. अक्षरच्या जागी फिरकी गोलंदाज कुलदीप यादव (Kuldeep Yadav) याला संधी मिळाली होती, पण आता अक्षरचे पुनरागमन झाल्यानंतर त्याला संघातून बाहेर जावे लागले.

क्रिकबजने दिलेल्या माहितीनुसार अक्षर पटेल दुखापतीतून पूर्णपणे बरा झाला आहे आणि संघासोबत सामील झाला आहे. माहितीनुसार अक्षर मोहालीमध्ये कसोटी सामना सुरू असतानाचा संघासोबत जोडला गेला आहे. कुलदीपला आता संघातून रिलीज केले गेले आहे. संघ व्यवस्थापनाच्या मते आता संघात दोन डावखुरे फिरकी गोलंदाज झाले आहेत, अशात कुलदीपची गरज उरलेली नाही. १८ सदस्यीय संघात रविचंद्रन अश्विन आणि जयंत यादव या फिरकी गोलंदाजांचाही समावेश आहे.