बिहारचे वेगवान गोलंदाज आकाश दीप आणि मुकेश कुमार यांची बिहार पोलीस दलात थेट पोलीस उपाधीक्षक (DSP) म्हणून नियुक्ती करण्यात आली आहे. बिहार सरकारच्या ‘उत्कृष्ट खेळाडूंची थेट भरती नियम, २०२६’ अंतर्गत या दोघांची निवड करण्यात आली आहे. सामान्य प्रशासन विभागाने ही माहिती गृह विभागाच्या सचिवांना कळवली आहे.
रोहतास जिल्ह्यातील सासारामचे रहिवासी असलेले आकाश दीप आणि गोपालगंजचे रहिवासी असलेले मुकेश कुमार यांनी भारतीय क्रिकेटमधील आपल्या उल्लेखनीय कामगिरीद्वारे राष्ट्रीय आणि आंतरराष्ट्रीय स्तरावर बिहारचे नाव उंचावले आहे. मुख्यमंत्री सम्राट चौधरी यांच्या अध्यक्षतेखाली झालेल्या राज्य मंत्रिमंडळाच्या बैठकीत दोन दिवसांपूर्वीच या नवीन भरती नियमांना मंजुरी देण्यात आली होती.
विभागाच्या माहितीनुसार, मुकेश कुमार हे चीनमध्ये झालेल्या १९ व्या आशियाई क्रीडा स्पर्धेत (२०२३) सुवर्णपदक जिंकणाऱ्या भारतीय क्रिकेट संघाचे सदस्य होते. दुसरीकडे, आकाश दीप यांनी आशियाई क्रीडा स्पर्धा तसेच भारत-इंग्लंड कसोटी मालिकेत भारताचे प्रतिनिधित्व केले आहे.
मुकेश कुमारने भारतासाठी ३ कसोटी, ६ एकदिवसीय (ODI) आणि १७ टी-२० आंतरराष्ट्रीय सामने खेळले आहेत. तो सध्या आयपीएलमध्ये दिल्ली कॅपिटल्ससाठी खेळतो. तर दुसरीकडे, आकाश दीपने भारतासाठी प्रभावी कामगिरी करत १० कसोटी सामन्यांमध्ये २८ विकेट्स घेतले आहेत.
आकाश दीप २४ जून रोजी त्याची होणारी पत्नी अक्षिता राज हिच्याशी विवाहबंधनात अडकणार आहेत. रविवारी लग्नापूर्वीच्या कार्यक्रमांना सुरुवात होणार असून, त्याच्या मूळ गावी ‘बद्दी’ येथे ‘तिलक’ समारंभ पार पडणार आहे. लग्नाचा मुख्य सोहळा उत्तर प्रदेशातील वाराणसी येथे होणार आहे. लग्नापूर्वीच बिहार सरकारकडून डीएसपी (DSP) म्हणून नियुक्ती मिळाल्यामुळे त्यांच्या आनंदात भर पडली आहे.
१६ जून रोजी मुख्यमंत्री सम्राट चौधरी यांनी सासाराम येथील आकाश दीप यांच्या घरी जाऊन त्यांना लग्नासाठी शुभेच्छा दिल्या. या भेटीदरम्यान त्यांनी क्रिकेटपटूच्या कुटुंबीयांशी संवादही साधला. यापूर्वी, आकाश दीप यांनी बिहारच्या क्रीडा मंत्री श्रेयसी सिंग यांची भेट घेतली होती आणि त्यांना लग्नाचे निमंत्रण दिले होते
