टेनिसटॉप बातम्या

फेडरर-नदालच्या मक्तेदारीला आव्हान देणाऱ्या दिग्गजाचा टेनिसला अलविदा! सोशल मीडियावर केली भावनिक पोस्ट

पॅरिस ऑलिम्पिक 26 जुलैपासून सुरू होत आहे. दरम्यान, टेनिस चाहत्यांसाठी एक वाईट बातमी समोर आली आहे. ब्रिटनचा दिग्गज टेनिसपटू अँडी मरे यानं टेनिसला अलविदा केला आहे. “पॅरिस ऑलिम्पिकमधील टेनिस स्पर्धा ही माझ्या व्यावसायिक कारकिर्दीतील शेवटची स्पर्धा असेल”, असं अँडी मरेनं म्हटलं.

मरेनं मंगळवारी (23 जुलै) सोशल मीडियावर एक पोस्ट केली. तो पॅरिस ऑलिम्पिकनंतर व्यावसायिक टेनिसला अलविदा करणार असल्याचं या पोस्टमध्ये म्हटलं आहे. ऑलिम्पिकमध्ये 2 एकेरी सुवर्णपदक जिंकणारा अँडी मरे हा पहिला खेळाडू आहे. त्यानं 2008 मध्ये बीजिंग मध्ये पहिली ऑलिम्पिक स्पर्धा खेळली होती.

अँडी मरेनं ‘X’ वर लिहिलं, “माझ्या शेवटच्या टेनिस स्पर्धेसाठी मी पॅरिसमध्ये पोहोचलो आहे. ऑलिम्पिकसाठी पॅरिसला पोहचणं, ग्रेट ब्रिटनसाठी खेळणं, हा माझ्या कारकिर्दीतील आतापर्यंतचा सर्वात संस्मरणीय आठवडा राहिला. आज हे शेवटच्या वेळी करताना मला खूप अभिमानास्पद वाटत आहे.”

 

अँडी मरे पॅरिसमध्ये एकेरी आणि डबल इव्हेंटमध्ये भाग घेईल. हे त्याचं 5 वं ऑलिम्पिक असेल. मरेनं 2012 लंडन ऑलिम्पिकमध्ये पुरुष एकेरीत सुवर्णपदक जिंकलं होते. पुरुष एकेरीच्या अंतिम सामन्यात त्यानं स्वित्झर्लंडचा महान टेनिसपटू रॉजर फेडररचा पराभव केला होता. 2016 रिओ ऑलिम्पिकमध्ये अँडी मरेने सलग दुसऱ्यांदा सुवर्णपदक जिंकलं होतं. यावेळी त्यानं अंतिम सामन्यात अर्जेंटिनाच्या जुआन मार्टिन डेल पोट्रोचा पराभव केला होता. यासह, दोन ऑलिम्पिक एकेरी सुवर्णपदके जिंकणारा तो पहिला पुरुष टेनिसपटू ठरला.

अँडी मरेची गणना ब्रिटनच्या इतिहासातील सर्वोत्कृष्ट टेनिसपटूंमध्ये केली जाते. एकेकाळी टेनिसमध्ये रॉजर फेडरर, राफेल नदाल आणि नोव्हाक जोकोविच या तिघांची मक्तेदारी होती. अँडी मरेनं ही मक्तेदारी मोडून काढण्यात यश मिळवलं होतं. मरेनं 2013 आणि 2016 मध्ये दोन विम्बल्डन ग्रॅन्ड स्लॅम विजेतेपद जिंकली आहेत. याशिवाय तो पुरुषांच्या एकेरी रॅकिंगमध्ये अव्वल स्थानीही राहिला आहे.

महत्त्वाच्या बातम्या – 

‘किंग’ कोहलीनं क्रिकेटवर गाजवलंय वर्चस्व..! पण त्याची दहावीची मार्कशीट पाहून बसेल धक्का
ऑलिम्पिकमध्ये जिंकलेलं पदक खेळाडू दातांनी का चावतात? हा नियम आहे की परंपरा? जाणून घ्या
मेगा लिलावापूर्वी हैदराबादचा प्लॅन ठरला, 150चा स्पीड असणाऱ्या वेगवान गोलंदाजाला बसणार मोठा झटका!

Related Articles