कर्णधार रोहित शर्मा (Rohit Sharma) याच्या नेतृत्वातील भारतीय संघाने शनिवारी (२६ जानेवारी) श्रीलंकेविरुद्धच्या दुसरा टी-२० सामना ७ विकेट्सने जिंकला. या विजयानंतर भारताने मालिकेत (IND vs SL 2nd T20I) २-० अशी विजयी आघाडी घेतली आहे. रोहित शर्मा जेव्हापासून कर्णधार बनला आहे, तेव्हापासून भारतीय संघ सतत चांगले प्रदर्शन करत आहे आणि संघात अनेक युवा खेळाडूंना खेळण्याची संधी मिळाली आहे. शनिवारी विजय मिळवल्यानंतर रोहिने यासंदर्भात महत्वाचे संकेत दिले आहेत.
श्रीलंकेविरुद्धच्या दुसऱ्या टी२० सामन्यातील विजयानंतर रोहित शर्मा म्हणाला की, “विजयात मधल्या फळीचे महत्वाचे योगदान राहिले. अशाप्रकारची भागीदारी पाहणे चांगले होते. मागच्या काही सामन्यांमध्ये हे अनेकदा झाले आहे. काही षटकांमध्ये (पॉवर प्ले) गोलंदाजी चांगली झाली. आम्ही विरोधी संघातील फलंदाजांना धावा करण्यापासून रोखले. शेवटच्या ५ षटकांमध्ये जास्त धावा गेल्या. ही गोष्ट अशी आहे, जी आम्हाला समजून घेण्याची गरज आहे. परंतु आम्ही चांगले प्रदर्शन केले.”
युवा आणि नवीन खेळाडूंना संधी देण्याविषयी रोहित म्हणाला की, “फलंदाजांमध्ये आमच्याकडे खूप प्रतिभा आहे. आम्ही संधी देत राहू. याचा जास्तीत जास्त लाभ घेणे त्यांच्यावर (फलंदाजांवर) अवलंबून आहे. संजूने (सॅमसन) दाखवले की, तो किती चांगला खेळू शकतो. हे सर्व तुम्ही संधीचा फायदा घेण्याविषयी आहे. यामध्ये अनेक खेळाडू खूप प्रतिभाशाली आहेत. त्यांना फक्त तिथे जाणे आणि स्वतःला सिद्ध करण्याची संधी हवी आहे.”
“खूपजण संधीची वाट पाहत आहेत, त्यांचीही वेळ येईल. आम्हाला त्यांचाही विचार करावा लागेल, जे काही काळापासून संघातून आत बाहेर होत आहेत. आम्ही समजू शकतो की, त्या सर्वांमध्ये खूप प्रतिभा आहे. हा फक्त संधी देणे आणि आमच्याकडून मिळणाऱ्या समर्थनाचा विषय आहे.”