पाकिस्तानच्या जनतेला मोठी आशा होती की, त्यांचा संघ टी-२० वर्ल्ड कपमध्ये भारताला पराभूत करेल. मात्र, याच्या उलट घडले; पाकिस्तानी संघ साधी झुंजही देऊ शकला नाही. सूर्यकुमार यादव आणि कंपनीने पाकिस्तानविरुद्धचा सामना एकतर्फी जिंकला. नेहमीप्रमाणे या पराभवानंतर पाकिस्तानात गदारोळ माजला. पाकिस्तानी संघाच्या या दुरवस्थेला शोएब अख्तरने पीसीबी (PCB) प्रमुख मोहसीन नकवी यांना जबाबदार धरले. पण यादरम्यान त्याने ज्या शब्दांचा वापर केला, त्यावरून मोठा वाद निर्माण झाला.
शोएब अख्तरने एबीपी चॅनलवर बोलताना म्हटले की, “जर मला तुमच्या चॅनलचा अध्यक्ष बनवले, तर ते कसे चालवायचे हे मला समजणार नाही. ज्यांना क्रिकेटबद्दल काहीच माहिती नाही, त्यांना तुम्ही पीसीबीचे अध्यक्ष बनवले आहे. आता काय करणार? हा संघ कसा काय काम करेल? तुम्ही एका व्यक्तीला सुपरस्टार बनवले, पण तो एक सामनाही जिंकू शकत नाही. जो माणूस १० षटकेही खेळू शकत नाही, त्याला तुम्ही स्टार बनवून ठेवले आहे. असे स्टार असतील तर हीच अवस्था होणार.”
मोहसीन नकवी सध्या पाकिस्तान क्रिकेट बोर्डाचे प्रमुख आहेत, त्यांच्या कार्यकाळात आंतरराष्ट्रीय स्तरावर पाकिस्तान क्रिकेटची अनेकदा नाचक्की झाली आहे. आशिया चषकाची ट्रॉफी घेऊन ते पळून गेले होते, जी भारतीय संघाने जिंकली होती. सुरुवातीला पाकिस्तान भारतासोबत ग्रुप स्टेजचा सामना खेळण्यास नकार देत होता, ज्याचे कारणही नकवी यांनाच मानले जात होते. मात्र, नंतर पीसीबीला आयसीसीसमोर झुकावे लागले. पाकिस्तान क्रिकेटमध्ये नकवी यांना एखाद्या नायकाप्रमाणे सादर केले जाते, पण जेव्हा त्यांचा संघ भारताकडून हरला, तेव्हा पाकिस्तानच्याच माजी क्रिकेटपटूने त्यांना ‘जाहिल’ (अडाणी/अज्ञानी) म्हटले.
भारताविरुद्धच्या पराभवानंतर शोएब अख्तर म्हणाला होता, “जगातील सर्वात मोठा गुन्हा कोणता? तर एखाद्या अयोग्य व्यक्तीला मोठ्या पदावर बसवणे. जेव्हा तुम्ही अयोग्य आणि अज्ञानी व्यक्तीला मोठे काम सोपवता, तेव्हा ती व्यक्ती देशाचा विनाश करेल. उदाहरण तुमच्या समोर आहे. तुमचा (भारतीय) संघ खूप पुढे निघून गेला आणि आम्ही (पाकिस्तान) मागे राहिलो. कोणतीही स्पर्धाच नाही, फक्त टीआरपीचा खेळ सुरू आहे. टीव्हीवर जाहिराती विका, पण मैदानावर कुठेच संघर्ष दिसत नाही. तरीही मला वाटते की आता पाकिस्तानने नामिबियाला हरवावे आणि पुढे एखादा चमत्कार व्हावा. मी पाकिस्तानची साथ सोडू शकत नाही, ती मी देतच राहीन.”
अख्तरने मोहसीन नकवींबद्दल जे काही विधान केले, त्यामुळे पाकिस्तानात खळबळ उडाली. त्याने स्वतःच्याच देशाच्या क्रिकेट बोर्डाच्या प्रमुखाला ‘जाहिल’ संबोधले होते. हा वाद इतका वाढला की अख्तरला आपल्या विधानावरून ‘यू-टर्न’ घ्यावा लागला. त्याने स्पष्ट केले की, माझ्या बोलण्याचा चुकीचा अर्थ काढला गेला.
शोएब अख्तरने नंतर सांगितले की, त्याने ‘जाहिल’ हा शब्द मोहसीन नकवी यांच्यासाठी वापरला नव्हता. ते विधान आंतरराष्ट्रीय क्रिकेट चालवणाऱ्या वरिष्ठ अधिकाऱ्यांसाठी होते. त्याने असेही म्हटले की, “मी मोहसीन भाईंबद्दल काहीही नकारात्मक ऐकून घेणार नाही.” आता नकवींची स्तुती करताना अख्तर म्हणाला, “ते पाकिस्तान क्रिकेटला अधिक चांगले बनवू इच्छितात. ते एक चांगले व्यक्ती आहेत आणि त्यांना चांगले काम करायचे आहे. फक्त त्यांना योग्य सल्ला मिळत नाहीये.” नकवी योग्य संघ निवडण्यासाठी योग्य माणसांची निवड करत नसल्याचेही अख्तरने नमूद केले.
