खेळाडूंच्या भूकेशी खेळतीये फुड डिलिव्हरी कंपनी; शुबमन गिलपाठोपाठ ‘या’ खेळाडूला दिला ‘धोका’

धकाधकीच्या जीवनात सध्या कुणाकडेही फारसा वेळ नसतो. जेवणाबाबत बोलायचं झालं, तर फार क्वचित लोक असे असतात, जे बाहेरून काही न मागवता घरगुती जेवणास पसंती देतात. मात्र, जर आपण बाहेर असू किंवा जेवण बनवण्याचा आपल्याकडे वेळ नसेल, तर आपण फुड डिलिव्हरी ऍपवरून जेवण मागवतो. मग अशावेळी पोटात कावळे ओरडत असताना जर पटकन जेवण आले नसेल, तर नक्कीच प्रत्येकाची चिडचिड होते. असेच काहीसे मागील काही दिवसांपूर्वी आयपीएल फ्रँचायझी गुजरात टायटन्सचा युवा फलंदाज शुबमन गिलबाबत झाले होते. त्याने सोशल मीडियावर स्विगीविरुद्ध वेळेवर जेवण न मिळाल्याने आपला राग व्यक्त केला होता. आता स्विगीच्या अशाच धोक्याचा शिकार लखनऊ सुपर जायंट्स असलेला कृष्णप्पा गॉथम झाला आहे.

कृष्णप्पा गॉथमला (Krishnappa Gowtham) अनेक वेळ वाट पाहिल्यानंतर प्रत्युत्तरात जेवण नाही, तर असे उत्तर मिळाले, ज्याची कोणीही अपेक्षा केली नसेल. कृष्णप्पाने त्याच्या अधिकृत ट्विटर अकाऊंटवर स्विगीच्या (Swiggy) हेल्पलाईन अकाऊंटला टॅग करत लिहिले की, “मला स्विगीचा सर्वात वाईट अनुभव आला आहे. माझी ऑर्डर #१३४६६९७३६४४८ रात्री ९.४५ वाजता देण्यात आली आणि मला अद्याप ऑर्डर मिळालेली नाही. ११.३५ वाजता मला शेवटी ग्राहक समर्थनाकडून प्रतिसाद मिळाला की, ते काहीही करू शकत नाहीत. हॅशटॅग RIPcustomercare.”

https://twitter.com/gowthamyadav88/status/1521554087996579840