सध्या भारत आणि इंग्लंड महिला संघांमध्ये टी-20 मालिका सुरू आहे. दोन्ही संघांमधील पाच सामन्यांच्या टी-20 मालिकेतील चौथा सामना मँचेस्टरमधील ओल्ड ट्रॅफर्ड मैदानावर खेळला गेला. या सामन्यात टीम इंडियाची अनुभवी फिरकी गोलंदाज दीप्ती शर्माने चेंडूने इतिहास रचला आहे. ती आता महिला टी-20 आंतरराष्ट्रीय क्रिकेटमध्ये सर्वाधिक विकेट घेणारी फिरकी गोलंदाज बनली आहे. या बाबतीत तिने पाकिस्तानी फिरकी गोलंदाज निदा दारला मागे टाकले आहे.
यापूर्वी महिला टी-20 आंतरराष्ट्रीय क्रिकेटमध्ये फिरकी गोलंदाजांमध्ये सर्वाधिक विकेट घेण्याचा विक्रम निदा दारच्या नावावर होता. तिने या फॉरमॅटमध्ये 144 विकेट्स घेतल्या होत्या. पण आता दीप्ती शर्माने तिला मागे टाकले आहे, ती आता सर्वाधिक विकेट घेणारी फिरकी गोलंदाज बनली आहे. तिच्या नावावर सध्या 145 विकेट्स आहेत. महिला टी-20 मध्ये सर्वाधिक विकेट घेण्याचा विक्रम ऑस्ट्रेलियाच्या मेगा शटच्या नावावर आहे. तिने या फॉरमॅटमध्ये 151 विकेट्स घेतल्या आहेत आणि दीप्ती शर्माला तिला मागे टाकण्यासाठी आणखी 7 विकेट्सची आवश्यकता आहे.
दीप्ती शर्माबद्दल बोलायचे झाले तर, तिने आतापर्यंत 5 कसोटी, 106 एकदिवसीय आणि 127 टी-20 मध्ये भारताचे प्रतिनिधित्व केले आहे. तिने कसोटीत 20, एकदिवसीय सामन्यात 135 आणि टी-20 मध्ये 144 विकेट्स घेतल्या आहेत. मर्यादित षटकांच्या फॉरमॅटमध्ये ती भारताची सर्वात यशस्वी अष्टपैलू खेळाडूंपैकी एक आहे. महिला एकदिवसीय सामन्यातही तिच्या नावावर शतक आहे.
मँचेस्टरमध्ये खेळल्या गेलेल्या चौथ्या टी-20 सामन्याबद्दल बोलायचे झाले तर, टीम इंडियाने 6 विकेट्सने विजय मिळवला आणि 5 सामन्यांच्या टी-20 मालिकेत 3-1 अशी अजिंक्य आघाडी घेतली. प्रथम फलंदाजी करताना इंग्लंडने 7 विकेट्स गमावून 126 धावा केल्या. प्रत्युत्तरात, टीम इंडियाने 17 षटकांत 4 विकेट्स गमावून 127 धावांचे लक्ष्य गाठले. राधा यादवला तिच्या उत्कृष्ट कामगिरीसाठी सामनावीर पुरस्काराने सन्मानित करण्यात आले.
