यंदा इंग्लंडचा संघ करणार का ११ वर्षांपूर्वीच्या कारनाम्याची पुनरावृत्ती? नाहीतर रिकाम हात जावं लागणार घरी

प्रतिष्ठित आंतरराष्ट्रीय क्रिकेट स्पर्धा, ऍशेस मालिका (Ashes Series) याची येत्या ८ डिसेंबरपासून सुरुवात होणार आहे. इंग्लंड विरुद्ध ऑस्ट्रेलिया संघांमध्ये होणाऱ्या या स्पर्धेत यंदा ५ कसोटी सामने खेळले जाणार आहेत. ही मालिका जिंकणारा संघ ऍशेस ट्रॉफीवरही आपले नाव कोरेल. परंतु यंदाची ऍशेस ऑस्ट्रेलियामध्ये होणार असल्याने पाहुण्या इंग्लंडच्या गोटात चिंतेचे वातावरण आहे. त्यातही इंग्लंडची ऑस्ट्रेलियामधील मागील कामगिरी त्यांच्यासाठी आणखीनच चिंतेची बाब ठरू शकते.

इंग्लंड संघाने ऑस्ट्रेलियामध्ये ११ वर्षांपूर्वी म्हणजेच २०१०-११ मध्ये शेवटची कसोटी मालिका जिंकली होती. त्यावेळी उभय संघांमध्ये ५ सामन्यांची कसोटी मालिका झाली होती. ज्यामध्ये इंग्लंडने ३-१ अशी बाजी मारली होती. त्यानंतर इंग्लंडला ऑस्ट्रेलियामध्ये ऍशेज मालिका खेळताना विजय मिळवण्यात अपयश आले आहे. 

२०१०-११ नंतर इंग्लंडचा संघ २०१३-१४ ऍशेस मालिकेसाठी ऑस्ट्रेलियामध्ये गेला होता. त्यावेळी इंग्लंडला अतिशय लाजिरवाण्या पराभवाला सामोरे जावे लागले होते. ऑस्ट्रेलियाने यावेळी ५ सामन्यांच्या कसोटी मालिकेत इंग्लंडला ५-० असा व्हाईटवॉश दिला होता. त्यानंतर २०१७-१८ मध्ये इंग्लंडचा संघ ऍशेस मालिकेसाठी ऑस्ट्रेलियामध्ये गेला होता. यावेळी ५ सामन्यांच्या कसोटी मालिकेतील १ सामना अनिर्णित राखण्यात त्यांना यश आले होते. परंतु उर्वरित चारही सामने जिंकत ऑस्ट्रेलियाने ४-० ने ऍशेस ट्रॉफी पटकावली होती.

यानंतर आता पुन्हा ऍशेस मालिका २०२१ -२२ चे सर्व सामने ऑस्ट्रेलियामध्ये होणार आहेत. त्यामुळे इंग्लंडचा संघ यंदाही ही मालिका गमावत ऑस्ट्रेलियामध्ये पराभवाची हॅट्रिक करतो की, हा नकोसा विक्रम मोडतो, यावर सर्वांचे लक्ष असणार आहे.

यजमान ऑस्ट्रेलिया या मालिकेतील पहिल्या सामन्यासाठी २ दिवसआधीच प्लेइंग इलेव्हनची घोषणा केली आहे. इंग्लंडनेही सामन्याच्या एका दिवसापूर्वी १२ सदस्यीय संघ जाहीर केला आहे.