स्टीव्ह स्मिथ ऑस्ट्रेलियाच्या टी-२० संघात पुनरागमन करण्यास उत्सुक आहे. त्याने वनडे (एकदिवसीय) फॉरमॅटमधून निवृत्ती घेतली असली, तरी टी-२० मधून घेतलेली नाही. बिग बॅश लीगमध्ये त्याने धमाकेदार फलंदाजी करत १६८ च्या तुफानी स्ट्राइक रेटने २९९ धावा केल्या होत्या, तरीही त्याला टी-२० वर्ल्ड कप २०२६ साठी ऑस्ट्रेलियन संघात (Australia Squad T20 World Cup 2026) स्थान मिळाले नव्हते. या सर्वांच्या दरम्यान, पीएसएलच्या (PSL) नवनवीन संघ सियालकोट स्टालियन्सने त्याला आपल्या ताफ्यात सामील करून घेतले आहे.
काही आठवड्यांपूर्वी पीएसएलमधील २ नवीन संघांसाठी लिलाव झाला होता, ज्यामध्ये सियालकोटचा संघ समोर आला. सियालकोट स्टालियन्सने स्टीव्ह स्मिथला ‘मार्की प्लेयर’ म्हणून आपल्या संघात स्थान दिले आहे. विशेष म्हणजे, स्मिथ यापूर्वी कधीही पाकिस्तान सुपर लीगमध्ये खेळलेला नाही. २०१९ मध्ये तो पीएसएलमध्ये पदार्पण करणार होता, परंतु दुखापतीमुळे त्याला एकही सामना खेळता आला नव्हता.
काही रिपोर्ट्सनुसार, पीएसएलमध्ये मार्की प्लेयर्सना साडेतीन लाख अमेरिकन डॉलर्स ते ४ लाख डॉलर्सच्या दरम्यान मानधन मिळते.
बिग बॅश लीगमध्ये स्टीव्ह स्मिथ सिडनी सिक्सर्सकडून खेळला होता. संपूर्ण स्पर्धेत तो या संघासाठी सर्वाधिक धावा करणारा खेळाडू ठरला. त्याने ६ सामन्यांत एक शतक आणि २ अर्धशतकांसह २९९ धावा केल्या होत्या. स्मिथची ओळख प्रामुख्याने कसोटी फलंदाज म्हणून आहे, परंतु टी-२० वर्ल्ड कप संघात स्थान मिळवण्याच्या जिद्दीने त्याने बीबीएलमध्ये (BBL) तब्बल १६८ च्या स्ट्राइक रेटने धावा केल्या होत्या. दुर्दैवाने, त्याचे हे सर्व प्रयत्न अपयशी ठरले.
स्टीव्ह स्मिथच्या संपूर्ण टी-२० कारकिर्दीवर नजर टाकली तर त्याने आतापर्यंत २७२ सामन्यांत ६,२४२ धावा केल्या आहेत. या प्रदीर्घ कारकिर्दीत त्याने ५ शतके आणि ३० अर्धशतके झळकावली आहेत. आंतरराष्ट्रीय टी-२० क्रिकेटमध्येही त्याने एक हजारहून अधिक धावा पूर्ण केल्या आहेत. मात्र, त्याचा स्ट्राइक रेट केवळ १२५.४५ इतकाच आहे.
