भारताचा स्टार अष्टपैलू खेळाडू रवींद्र जडेजाने त्याच्या एका महान विक्रमासह महानतेच्या शिखरावर पोहोचला आहे. रवींद्र जडेजाच्या या कामगिरीने जागतिक क्रिकेट हादरले आहे. रवींद्र जडेजाने वेस्ट इंडिजचे महान क्रिकेटपटू सर गारफिल्ड सोबर्स यांच्या एका महान विक्रमाची बरोबरी केली आहे. यासह रवींद्र जडेजाने क्रिकेटच्या इतिहासात आपले नाव सुवर्णाक्षरात कोरले आहे.
इंग्लंडविरुद्ध मँचेस्टर येथे खेळल्या गेलेल्या चौथ्या कसोटी सामन्यात रवींद्र जडेजाने दुसऱ्या डावात नाबाद 107 धावा केल्या आणि कसोटी सामना अनिर्णित ठेवण्यात मोठी भूमिका बजावली. याशिवाय, रवींद्र जडेजाने इंग्लंडविरुद्ध मँचेस्टर कसोटीत पहिल्या डावात 4 विकेट्स घेतल्या. इंग्लंडविरुद्ध सुरू असलेल्या कसोटी मालिकेत रवींद्र जडेजाने पाचव्यांदा 50 हून अधिक धावा केल्या. यासह, रवींद्र जडेजाने वेस्ट इंडिजचे महान क्रिकेटपटू सर गारफिल्ड सोबर्स यांच्या 59 वर्ष जुन्या विक्रमाची बरोबरी केली.
इंग्लंडमध्ये खेळल्या गेलेल्या कसोटी मालिकेत सहाव्या किंवा त्याखालील क्रमांकावर फलंदाजी करताना सर्वाधिक 50 हून अधिक धावा करण्याच्या सर गारफिल्ड सोबर्स यांच्या विक्रमाची रवींद्र जडेजाने बरोबरी केली आहे. 1966 मध्ये इंग्लंडविरुद्ध खेळल्या गेलेल्या कसोटी मालिकेत सर गारफिल्ड सोबर्स यांनी पाच वेळा 50हून अधिक धावा केल्या. रवींद्र जडेजा आणि गारफिल्ड सोबर्स दोघांनीही प्रत्येकी 8 डावात हा पराक्रम केला.
इंग्लंडमध्ये सहाव्या किंवा त्याखालील क्रमांकावर फलंदाजी करताना 9 वेळा 50 हून अधिक धावा करणारा रवींद्र जडेजा पहिला पाहुणा फलंदाज ठरला आहे. रवींद्र जडेजाने या बाबतीतही गारफिल्ड सोबर्सची बरोबरी केली आहे. याशिवाय, रवींद्र जडेजा इंग्लंडमध्ये सहाव्या किंवा त्याखालील क्रमांकावर फलंदाजी करताना 1000 पेक्षा जास्त धावा करणारा दुसरा पाहुणा क्रिकेटपटू बनला आहे. रवींद्र जडेजाच्या आधी गारफिल्ड सोबर्सने ही कामगिरी केली होती.
रवींद्र जडेजाच्या नावावर आता इंग्लंडमध्ये 34 विकेट्स आहेत. तो एका देशात 1000 हून अधिक धावा करणारा आणि 30 पेक्षा जास्त विकेट्स घेणारा तिसराच पाहुणा क्रिकेटपटू ठरला. रवींद्र जडेजाने या बाबतीत गारफिल्ड सोबर्स आणि विल्फ्रेड रोड्सची बरोबरी केली आहे. भारत विरूद्ध इंग्लंड यांच्यात मँचेस्टरमध्ये खेळला गेलेला अँडरसन-तेंडुलकर ट्रॉफीचा चौथा कसोटी सामना अनिर्णित राहिला आहे. या सामन्यात भारतीय संघाला पराभवाचा धोका होता. पण रवींद्र जडेजा (नाबाद 107) आणि वॉशिंग्टन सुंदर (नाबाद 101) यांनी केवळ नाबाद शतकेच केली नाहीत तर 203 धावांची भागीदारी करून सामना अनिर्णित ठेवला. हा ड्रॉ भारतासाठी विजयापेक्षा कमी नाही.
