रोहित शर्माचा हरवलेला जुना फॉर्म अखेर परतला आहे. कटकमधील दुसऱ्या एकदिवसीय सामन्यात भारतीय कर्णधार रोहित शर्माने इंग्लंडच्या गोलंदाजांना धूळ चारून एक नवा विक्रम रचला. इंग्लंडच्या 304 धावांचा पाठलाग करताना, रोहित शर्माने शुबमन गिलसह टीम इंडियाला धमाकेदार सुरुवात दिली. भारतीय संघाने फक्त 10 षटकांत 77 धावा केल्या. रोहित शर्मानेही 30 चेंडूंत आपले अर्धशतक पूर्ण केले. रोहितच्या एकदिवसीय कारकिर्दीतील हे तिसरे सर्वात जलद अर्धशतक होते. रोहितने गिलसोबत मिळून शानदार शतकी भागीदारी केली. 17 व्या षटकात अर्धशतक झळकावल्यानंतर गिल पॅव्हेलियनमध्ये परतला पण रोहितची बॅट गर्जना करत राहिली. दरम्यान, विराट कोहली 5 धावा काढून स्वस्तात पॅव्हेलियनमध्ये परतला. पण रोहित शर्माने फलंदाजीने कहर सुरूच ठेवला. अशाप्रकारे, रोहित शर्माने 26 व्या षटकात शानदार षटकार मारून त्याच्या एकदिवसीय कारकिर्दीतील 32 वे शतक पूर्ण केले.
रोहितने 76 चेंडूत तुफानी शतक ठोकले जे त्याचे आंतरराष्ट्रीय क्रिकेटमधील 49 वे शतक आहे. यासह, रोहितने राहुल द्रविडचा आंतरराष्ट्रीय क्रिकेटमध्ये 48 शतकांचा मोठा विक्रम मोडला. एवढेच नाही तर रोहितने सचिन तेंडुलकरचा एक मोठा विक्रमही मोडला जो अनेक वर्षांपासून अखंड होता. खरं तर, रोहित शर्मा वयाच्या 30 व्या वर्षानंतर भारतासाठी आंतरराष्ट्रीय क्रिकेटमध्ये सर्वाधिक शतके करणारा फलंदाज बनला आहे. त्याने सचिन तेंडुलकरचा 35 शतकांचा विक्रम मोडला. वयाच्या 30 व्या वर्षानंतर रोहित शर्माने क्रिकेटच्या तिन्ही स्वरूपात 36 शतके झळकावली आहेत.
भारतासाठी सर्वाधिक शतके (30वर्षांनंतर)
36– रोहित शर्मा
35 – सचिन तेंडुलकर
रोहित शर्मा 90 चेंडूत 12 चौकार आणि 7 षटकारांसह 119 धावा काढून बाद झाला. या शतकी खेळीदरम्यान, हिटमॅनने सचिनचा आणखी एक मोठा विक्रम मोडला. रोहित शर्मा आता आंतरराष्ट्रीय क्रिकेटमध्ये भारतीय सलामीवीर म्हणून दुसऱ्या क्रमांकाचा सर्वाधिक धावा करणारा फलंदाज बनला आहे. सचिनला मागे टाकत रोहितने हा मोठा टप्पा गाठला. सचिनने सलामीवीर म्हणून 346 सामन्यांमध्ये 15355 धावा केल्या होत्या आणि आता रोहितने सलामीवीर म्हणून 343 सामन्यांमध्ये 15404 धावा केल्या आहेत. या बाबतीत वीरेंद्र सेहवाग पहिल्या क्रमांकावर आहे. सेहवागने भारतासाठी सलामीवीर म्हणून सर्वाधिक 15758 धावा केल्या आहेत.
भारतीय सलामीवीर म्हणून सर्वाधिक धावा
16119- वीरेंद्र सेहवाग
15404- रोहित शर्मा
15335- सचिन तेंडुलकर
12258- सुनील गावस्कर
10867- शिखर धवन
हेही वाचा-
IND vs ENG: रोहितचा स्फोटक खेळ, भारताचा मालिका विजय, 416 दिवसांची प्रतीक्षा संपली!
चॅम्पियन्स ट्राॅफीपूर्वी सुरक्षेच्या कारणास्तव पाकिस्ताननं घेतला मोठा निर्णय, पाहा प्रकरण
IND vs ENG; रोहितने शतक झळकावून केला कमबॅक! विराटचा खराब फाॅर्म कायम
