लीड्समध्ये खेळल्या गेलेल्या पहिल्या कसोटी सामन्यात भारताला दारुण पराभवाचा सामना करावा लागला. बेन डकेटच्या शानदार शतकाच्या जोरावर इंग्लंडने 371 धावांचे मोठे लक्ष्य अगदी सहजपणे गाठले. इंग्लंडने पाचव्या दिवशी हा सामना पाच विकेट्सने जिंकला आणि यासह पाच कसोटी सामन्यांच्या मालिकेत 1-0 अशी आघाडी घेतली. बेन डकेट इंग्लंडच्या विजयाचा हिरो होता, त्याने 170 चेंडूत 21 चौकार आणि एका षटकाराच्या मदतीने 149 धावांची शानदार खेळी खेळली. डकेटने त्याचा जोडीदार जॅक क्रॉली (65 धावा) सोबत पहिल्या विकेटसाठी 188 धावांची दमदार भागीदारी केली. या जोडीने पहिल्याच सत्रात भारताच्या पुनरागमनाच्या सर्व आशा संपुष्टात आणल्या. त्यानंतर जो रूटने 53 धावा आणि जेमी स्मिथने 44 धावांची उपयुक्त खेळी करत संघाला ऐतिहासिक लक्ष्य गाठून दिले.
या विजयासह, इंग्लंडला वर्ल्ड टेस्ट चॅम्पियनशिपमध्ये 12 मौल्यवान गुण मिळाले आहेत आणि त्यांचा पॉइंट्स टक्केवारी म्हणजेच PCT 100 आहे. अशाप्रकारे, इंग्लंडने 2025-27 च्या WTC पॉइंट्स टेबलमध्ये अव्वल स्थान पटकावले आहे. तर बांगलादेश संघ 4 गुणांसह दुसऱ्या आणि श्रीलंका संघ तिसऱ्या स्थानावर आहे. लंकेचेही फक्त 4 गुण आहेत. दोन्ही संघांचे PCT देखील समान आहे. नुकतेच गॉलमध्ये श्रीलंका आणि बांग्लादेश यांच्यात खेळलेला कसोटी सामना अनिर्णित राहिला. त्यामुळेच दोन्ही संघांचे पॉइंट्स आणि PCT समान आहेत.
दुसरीकडे, वर्ल्ड टेस्ट चॅम्पियनशिप 2025-27 मध्ये पराभवाने सुरुवात करणाऱ्या टीम इंडियाला खूप फटका बसला आहे. टीम इंडियाने टेबलमध्ये थेट चौथ्या स्थानावरून सुरुवात केली आहे. सध्या भारताचे 0 गुण आणि 0 PCT आहे. टीम इंडिया बांगलादेश आणि श्रीलंका सारख्या संघांपेक्षाही खाली आहे. अशा परिस्थितीत, टीम इंडियासाठी पुढील कसोटीत पुनरागमन करणे आणि गुण मिळवणे खूप महत्वाचे असेल. दुसरी कसोटी 2 जुलैपासून सुरू होईल
टीम इंडियाचा WTCचा प्रवास नुकताच लीड्स कसोटीतील पराभवाने सुरू झाला आहे, परंतु अशा अडचणी भविष्यात पॉइंट टक्केवारी (पीसीटी) ला महागात पडू शकतात. इंग्लंडने शानदार विजयासह WTC 2025-27 च्या शर्यतीत आपला मजबूत दावा सादर केला आहे. आता भारतीय संघ पुढील कसोटीत पुनरागमन करू शकतो की नाही हे पाहणे बाकी आहे.
