इंग्लंड विरुद्ध भारत दरम्यानचा पहिला कसोटी सामना पावसामुळे अनिर्णीत राहिला. पहिल्या दिवसापासूनच्या उत्कृष्ट खेळीमुळे भारतीय संघ विजयापासून अगदी काही धावा दूर होता. मात्र पावसाने भारतीय संघाच्या विजयावर पाणी फेरले. पाचव्या दिवशी एकही चेंडू न टाकता. पहिल्या सामन्याचा निकाल अनिर्णित राहिला.
पहिल्या कसोटी सामन्यातील चौथ्या दिवशी दुसऱ्या डावात जो रूटच्या शतकीय खेळीमुळे इंग्लंड संघाने ३०३ धावा करत भारतीय संघासमोर २०९ धावांचे आव्हान ठेवले होते. त्यानंतर भारतीय संघाची धावसंख्या चौथ्या दिवसाअंती १ बाद ५२ धावा अशी होती. पाचव्या दिवशी भारतीय संघाला ९ विकेटच्या बदल्यात केवळ १५७ धावांची आवश्यकता होती.
इंग्लंड विरुद्ध भारत दरम्यानचा पहिला कसोटी सामना अनिर्णित राहिल्यानंतर पाकिस्तानचा माजी कर्णधार इंजमाम उल हकने याबाबत आपले मते मांडले. पहिला सामना जरी अनिर्णीत राहिला असला तरी भारतीय संघ ही मालिका जिंकण्याचा प्रबळ दावेदार आहे, असे त्यानी म्हटले आहे. त्याच्या यूट्यूब चॅनलवर या सामन्याचे विश्लेषण करताना तो म्हणाला, “क्रिकेटमध्ये कोणत्याही कठीण परिस्थितीतही भारतीय संघ उत्कृष्टपणे खेळतो. त्यामुळे सध्याच्या भारतीय संघाने मला खूप प्रभावित केले आहे.”
त्याचबरोबर पुढे बोलताना तो म्हणाला, “इंग्लंड विरुद्धची ही मालिका भारताने जिंकण्याची शक्यता खूप जास्त आहे. हा तर्क मी पहिल्या सामन्यावरून देत नसून, गेल्या दोन वर्षात भारतीय संघाने अत्यंत उत्कृष्ट कामगिरी केली आहे. त्याचबरोबर भारतीय संघात ज्याप्रकारे युवा खेळाडूंनी आपल्या कौशल्याचे प्रदर्शन केले आहे. ते पाहता भारतीय संघ सध्या बलवान स्थितीत आहे.”
“एक काळ होता जेव्हा भारतीय संघ मायदेशात चांगली कामगिरी करायचा. परंतु, विदेशात भारतीय संघाला म्हणावे तसे यश प्राप्त होत न्हवते. परंतु, भारतीय युवा खेळाडूंनी ही स्थिती बदलली. आता भारतीय संघ विदेशी दौऱ्यातही कमालीची कामगिरी करताना दिसून येत आहे,” असेही तो म्हणाला.
दरम्यान, भारतीय संघाने इंग्लंडविरुद्धच्या पहिल्या कसोटी सामन्यात पहिल्या दिवसापासून वर्चस्व राखले होते, पहिल्या डावात भारतीय संघाने ९५ धावांची आघाडी मिळवली होती. तसेच दुसऱ्या डावातही चांगली कामगिरी करत भारतीय संघाने इंग्लंडला ३०३ धावांत रोखले ज्यामुळे भारतीय संघाला २०९ धावांचे आव्हान मिळाले. परंतु, पाचव्या दिवशीच्या सततच्या पावसामुळे एकही चेंडू न खेळता सामना अनिर्णित राहिला. या मालिकेतील दुसरा कसोटी सामना १२ ऑगस्ट पासून लॉर्ड्सच्या मैदानात खेळविण्यात येणार आहे.
महत्वाच्या बातम्या –
–आधी कर्णधारपद गेलं, मग संघातील स्थानही; उर्वरित आयपीएल हंगामात खेळणार का वॉर्नर? घ्या जाणून
–मयंक भाऊ परतले, सरावालाही लागले; पण लॉर्ड्स कसोटीत मिळेल का सलामीला संधी?
–‘मिशन ऑस्ट्रेलिया’ फत्ते करण्यासाठी भारतीय संघाची तयारी सुरू, ‘या’ दिवशीपासून करणार सराव
