काय सांगता! विराट- रहाणे खेळणार चेन्नईकडून? मिटवणार मधल्या फळीतील चिंता

नवी दिल्ली। चेन्नई सुपर किंग्स आयपीएलमधील सर्वाधिक सातत्याने चांगली कामगिरी करणारा संघ राहिला आहे. परंतु आयपीएल २०२० च्या १३ व्या हंगामात परिस्थिती बदललेली दिसत आहे. चेन्नई संघात परदेशी खेळाडूंची कमी नाही. परंतु संघाकडून चांगले भारतीय फलंदाजही नाहीत आणि त्यामुळे संघाच्या कामगिरीवर परिणाम होत आहे. चेन्नईचे सलामीवीर फलंदाज मुरली विजय पूर्णपणे फ्लॉप ठरला आहे, तर दुसरीकडे मधल्या फळीत फलंदाजी करणारा केदार जाधवनेही आतापर्यंत खूप खराब कामगिरी केली आहे.

या हंगामात चेन्नईचे दोन अनुभवी खेळाडू सुरेश रैना आणि हरभजन सिंग यांनी वैयक्तिक कारणांमुळे आयपीएलमधून माघार घेतली होती. त्यानंतर फ्रँचायझीकडून सांगण्यात आले होते की, त्यांच्या जागी इतर कोणत्याही खेळाडूंना संघात सामील करण्यात येणार नाही. परंतु चेन्नईच्या मधल्या फळीतील कमकुवत फलंदाजी संघाच्या पराभवाचं कारण बनत आहे. अशात मिड सिझन ट्रान्सफरमार्फत ज्या खेळाडूंना संधी मिळालेली नाही त्या खेळाडूंची आदलाबदल करता येते. चेन्नईकडे अजिंक्य रहाणे, पार्थिव पटेल आणि विराट सिंग यांसारखे खेळाडू पर्याय म्हणून उपलब्ध आहेत.

रहाणेबद्दल बोलायचं झालं, तर तो सध्या दिल्ली कॅपिटल्स संघाचा भाग आहे. परंतु त्याला आतापर्यंत एकाही सामन्यात खेळण्याची संधी मिळालेली नाही. जर तो चेन्नई संघात आला, तर चेन्नईच्या मधल्या फळीतील समस्या दूर करू शकतो. तसं पाहिलं, तर गरज पडल्यास रहाणे सलामीला फलंदाजी करण्याची जबाबदारीही सांभाळू शकतो. त्यामुळे चेन्नई संघ रहाणेला संघात घेण्याचा प्रयत्न करू शकतो.