सीएसके अन् केकेआर येणार आमने सामने; ‘अशी’ असू शकते दोन्ही संघांची प्लेइंग इलेव्हन

जगभरातील सर्वात प्रसिद्ध आणि मोठी टी-२० लीग म्हणजेच इंडियन प्रीमियर लीग होय. आयपीएल २०२१ च्या दुसऱ्या टप्प्यात रविवारी (२६ सप्टेंबर) डबल हेडर सामने खेळले जाणार आहेत. यातील पहिला सामना चेन्नई सुपर किंग्स आणि कोलकाता नाईट रायडर्स संघात खेळला जाणार आहे. या दुसऱ्या टप्प्यातील सुरुवातीचे दोन्हीही सामने सीएसकेने आपल्या खिशात घातले आहेत. यावेळी ते गुणतालिकेत दुसऱ्या स्थानी आहेत. दुसरीकडे केकेआरनेही दुसऱ्या टप्प्याती पुनरागमन करत दोन्ही सामने जिंकले आहेत. मात्र, केकेआर गुणतालिकेत चौथ्या स्थानी विराजमान आहे. दोन्ही संघ आजचा सामना जिंकून आपले गुणतालिकेतील स्थान मजबूत करण्याचा प्रयत्न करतील.

धोनीच्या नेतृत्वातील सीएसकेबाबत बोलायचं झालं, तर त्यांनी आतापर्यंत खेळलेल्या एकूण ९ सामन्यांपैकी ७ सामन्यात विजय मिळवला आहे. उर्वरित २ सामन्यात त्यांना पराभव स्वीकारावा लागला आहे. सीएसकेची कामगिरी पाहता त्यांची प्लेऑफमध्ये पोहोचण्याची शक्यता जास्त आहे. दुसरीकडे केकेआरने आपल्या ९ सामन्यांपैकी ४ सामन्यात विजय मिळवला आहे, तर उर्वरित ५ सामन्यात पराभव स्वीकारला आहे. दोन्ही संघामध्ये झालेल्या आयपीएलच्या सामन्यांबद्दल बोलायचं झालं, तर सीएसकेचं पारडं जड आहे. दोन्ही संघांनी एकमेकांविरुद्ध आतापर्यंत २६ सामने खेळले आहेत. यामध्ये सीएसकेने १६ सामने, तर केकेआरने ९ सामने जिंकले आहेत.