आयपीएलच्या मैदानात शनिवारी (दि. १० एप्रिल) दिल्ली कॅपिटल्स आणि कोलकाता नाईट रायडर्स यांच्यात आयपीएलचा १९वा सामना झाला. या सामन्यात दिल्ली कॅपिटल्सने ४४ धावांनी विजय मिळवला. ऑस्ट्रेलियाचा दिग्गज सलामीवीर फलंदाज डेविड वॉर्नर पाकिस्ताविरुद्धची मालिका उरकून या स्पर्धेसाठी परतला होता. वार्नरने या सामन्यात पुन्हा एकदा त्याचा ‘पुष्पा’ अवतार दाखवला आहे.
दाक्षिणात्य चित्रपट ‘पुष्पा’ (Pushpa) काही दिवसांपूर्वी चांगलाच गाजला होता. या चित्रपटातील गाणी आणि डायलॉग्ज मोठ्या प्रमाणात गाजले. अनेक क्रिकेटपटूंनी त्यावर व्हिडिओ आणि इंस्टाग्राम रील्स बनवल्या, ज्या चाहत्यांमध्ये खूप व्हायरल देखील झाल्या. डेविड वॉर्नर (David Warner) पुष्पा चित्रपटावर आधारीत व्हिडिओ बनवणाऱ्यांमध्ये आघाडीवर होता आणि त्याच्या डोक्यातून हा चित्रपट अजूनही गेलेला नाहीय. शनिवारी केकेआविरुद्धच्या सामन्यादरम्यान मैदानात चाहत्यांच्या मागणीमुळे वॉर्नरने पुन्हा एकदा ‘पुष्पा’ चित्रपटातील रूप धारण केले.
वॉर्नरने स्वतः त्याच्या अधिकृत इंस्टाग्राम खात्यावरून मैदानात पुष्पा चित्रपटातील श्रीवल्ली गाण्यावर डान्स करतानाचा व्हिडिओ शेअर केला आहे. व्हिडिओ शेअर करताना वॉर्नरने कॅप्शनमध्ये लिहिले की, “तुम्हाला काय वाटते? खूप चाहत्यांची मागणी होती…” वॉर्नरने शेअर केकेल्या या व्हिडिओवर चाहत्यांकडून मोठ्या प्रमाणात लाईक्स आणि कमेंट्स येत आहेत. सामन्यादरम्यान एकदा नाही, तर अनेक वेळा वॉर्नर या गाण्यावर डान्स स्टेप्स करताना दिसला. चाहत्यांमध्ये हा व्हिडिओ खूपच व्हायरल होत आहे.
https://www.instagram.com/p/CcNa_PPlWBI/
